టాలీవుడ్ లో ప్రముఖ కమెడియన్ గా పేరు ప్రఖ్యాతలు సంపాదించిన అలీ వైసీపీ నేతగానూ కొనసాగుతున్న సంగతి తెలిసిందే. వాస్తవానికి హీరో పవన్ కళ్యాణ్ కు అత్యంత సన్నిహితుడిగా పేరున్న అలీ…2019 ఎన్నికలకు ముందు జనసేనలో చేరతారని అందరూ భావించారు. కానీ, అనూహ్యంగా అలీ వైసీపీ తీర్థం పుచ్చుకున్నారు. రాజకీయాలు వేరు… సినిమాలు… స్నేహం వేరు అని అలీ చెప్పారు.
కానీ, ఇప్పటికీ పవన్ తనకు మంచి స్నేహితుడు అని చెబుతూ ఉంటారు అలీ. అయితే, వైసీపీపై కారాలు మిరియాలు నూరుతున్న పవన్ కు…వైసీపీ నేతగా ఉంటున్న అలీకి మధ్య కొంత గ్యాప్ వచ్చిందని చాలాకాలంగా ప్రచారం జరుగుతోంది. ఇక, ఏపీ ప్రభుత్వ ఎలక్ట్రానిక్ మీడియా సలహాదారుడిగా అలీని జగన్ నియమించడంతో ఆ గ్యాప్ మరింత పెరిగిందని పుకార్లు వచ్చాయి. ఇక, అలీ కూతురి పెళ్లికి పవన్ హాజరు కాకపోవడంతో ఆ పుకార్లు నిజమనేలా కామెంట్లు కూడా వచ్చాయి.
అయితే, పవన్ షూటింగులో ఉండి రాలేకపోయారని, తన ఇంటికి వచ్చి వధూవరులను కలుస్తానని మాటిచ్చారని అలీ అన్నారు. ఈ నేపథ్యంలోనే తాజాగా పవన్ కు సంబంధించి అలీ సంచలన ప్రకటన చేశారు. జగన్ ఆదేశిస్తే పవన్ పై పోటీ చేస్తానని అలీ షాకింగ్ స్టేట్ మెంట్ ఇచ్చారు. పవన్ తనకు మంచి మిత్రుడని కానీ, సినిమాలు, రాజకీయం వేరని చెప్పారు. రాబోయే ఎన్నికల్లో ఏపీలో వైసీపీ 175 స్థానాలలు గెలుస్తుందని ధీమా వ్యక్తం చేశారు. జగన్ ఆదేశిస్తే ఏపీలో ఎక్కడైనా పోటీ చేసేందుకు తాను సిద్ధమని ప్రకటించారు.
