టాలీవుడ్ యంగ్ హీరో విజయ్ దేవరకొండ…తన అభిమానులకు రౌడీ…తెలుగు చిత్ర పరిశ్రమలో తనకంటూ ప్రత్యేకమైన గుర్తింపు తెచ్చుకున్న యువ హీరో. అర్జున్ రెడ్డితో బాక్సాఫీస్ బద్దలు కొట్టిన విజయ్ దేవరకొండ…ఆ తర్వాత గీత గోవిందంతో ఆల్ టైం రికార్డు కలెక్షన్లు కొల్లగొట్టాడు. ఆ తర్వాత డియర్ కామ్రేడ్, నోటా, వరల్డ్ ఫేమస్ లవర్ వంటి చిత్రాలు అంతగా ఆకట్టుకోలేకపోయాయి.
ఆ తర్వాత తాజాగా పూరీ జగన్నాథ్ దర్వకత్వంలో లైగర్ గా త్వరలో ప్రేక్షకుల ముందుకు రాబోతున్నాడు విజయ్ దేవరకొండ. ఈ రోజు విజయ్ దేవర కొండ పుట్టిన రోజు సందర్భంగా ఈ చిత్ర టీజర్ ను విడుదల చేయాలనుకున్నారు. అయితే, కోవిడ్ సెకండ్ వేవ్ నేపథ్యంలో టీజర్ విడుదల వాయిదా పడడంతో రౌడీ ఫ్యాన్స్ అంతా నిరాశ చెందుతున్నారు. విజయ్ దేవరకొండ ఓ ఫైటర్ పాత్రలో లైగర్ చిత్రంలో నటిస్తోన్న సంగతి తెలిసిందే.
పూరీ కనెక్ట్స్, ధర్మ ప్రొడక్షన్స్ సంయుక్తంగా నిర్మిస్తున్న ఈ సినిమాలో అనన్య పాండే కథానాయిక. గతంలో విజయ్ ఎన్నడూ కనిపించని విభిన్న పాత్రలో ఈ చిత్రంలో దర్శనమివ్వబోతున్నాడట. అయితే, మే 9న విజయ్ బర్త్ డే సందర్భంగా ఈ చిత్ర టీజర్ విడుదల చేయాలని చిత్ర యూనిట్ భావించినా…కరోనా తీవ్రత దృష్ట్యా లైగర్ టీజర్ విడుదలను వాయిదా వేస్తున్నట్టు చిత్రబృందం ప్రకటించింది. పరిస్థితులు కుదుటపడి ప్రశాంత వాతావరణం ఏర్పడేంత వరకు లైగర్ టీజర్ విడుదలను వాయిదా వేస్తున్నామని చిత్ర యూనిట్ వెల్లడించింది.
