వంటలక్క అంటే సీరియల్ ప్రేమికులకు పరిచయం అక్కర లేదు. వాస్తవానికి, సీరియ‌ళ్ల‌న్నా, అందులోని న‌టీన‌టుల‌న్నా ఒక వ‌ర్గానికి చిన్న‌చూపు ఉంటుంది. కానీ వాళ్ల ఫాలోయింగ్‌ను త‌క్కువ చేయ‌లేం. ఇళ్ల‌లో ఉంటూ సీరియ‌ళ్లు చూసే ల‌క్ష‌లు, కోట్ల‌మంది మహిళ‌ల‌కు సీరియల్ న‌టీన‌టుల ప‌ట్ల ఆరాధ‌న భావం ఉంటుంది. వాళ్ల ఫేవ‌రెట్ సీరియల్ యాక్ట‌ర్ల‌ను వెండితెర‌పై చూడ‌డాన్ని ఇష్ట‌ప‌డ‌తారు. అందులోనూ కార్తీక దీపం లాంటి ఫేమ‌స్ సీరియ‌ల్లో డాక్ట‌ర్ బాబుగా న‌టించిన నిరుపమ్, వంటలక్క పాత్ర‌ను పోషించిన ప్రేమి విశ్వ‌నాథ్‌ల‌కు ఉన్న ఫాలోయింగే వేరు.
నిరుపమ్ ఇటీవ‌లే రంగ‌రంగ వైభ‌వంగా సినిమాలో త‌ళుక్కుమ‌న్నాడు. అందులో అత‌ను డాక్ట‌ర్ బాబు పాత్ర‌లోనే మెర‌వ‌డం విశేషం. ఇప్పుడు వంటలక్క ఓ పేరున్న సినిమాలో త‌ళుక్కుమ‌న‌బోతోంది. అక్కినేని నాగ‌చైత‌న్య హీరోగా త‌మిళ ద‌ర్శ‌కుడు వెంక‌ట్ ప్ర‌భు తెర‌కెక్కిస్తున్న సినిమాలో ప్రేమి విశ్వ‌నాథ్ ఓ ముఖ్య పాత్ర పోషిస్తోంది. ఈ చిత్రంలో ముఖ్య తారాగ‌ణం గురించి చిత్ర బృందం ఆరంభ ద‌శ‌లోనే అప్ డేట్స్ ఇచ్చేసింది. మెయిన్ కాస్ట్‌లో ప్రేమి గురించి ప్ర‌త్యేకంగా ప్ర‌స్తావించారంటే ఆమెది ప్రాధాన్యం ఉన్న పాత్రే కావ‌చ్చు.
ప్రేమి బేసిగ్గా మ‌ల‌యాళీ అయిన‌ప్ప‌టికీ ఆమెకు కార్తీక దీపం ద్వారా తెలుగులోనే మంచి ఫాలోయింగ్ వ‌చ్చింది. ఇక నాగ‌చైత‌న్య స‌ర‌స‌న కృతి శెట్టి న‌టిస్తున్న ఈ చిత్రంలో శ‌ర‌త్ కుమార్, అర‌వింద్ స్వామి, ప్రియ‌మ‌ణి, వెన్నెల కిషోర్, సంప‌త్‌ల‌తో పాటు వెంక‌ట్ ప్ర‌భు త‌మ్ముడైన ప్రేమ్‌జీ అమ‌ర‌న్ ముఖ్య పాత్ర‌లు పోషిస్తున్న‌ట్లు వెల్ల‌డైంది. వెంక‌ట్ ప్ర‌భు ప్ర‌తి సినిమాలోనూ అత‌డి త‌మ్ముడు ప్రేమ్‌జీ మంచి కామెడీ రోల్ చేస్తుంటాడు. ఈ చిత్రానికి వీరి క‌జిన్ అయిన యువ‌న్ శంక‌ర్ రాజాతో పాటు పెద‌నాన్న అయిన ఇళ‌య‌రాజా క‌లిసి సంగీతం అందించ‌నుండ‌డం విశేషం. శ్రీనివాసా సిల్వ‌ర్ స్క్రీన్ బేన‌ర్లో ఈ చిత్రం తెరకెక్కుతోంది.
