విజయవాడ రాజకీయాలలో కీలక నేత, మాజీ ఎమ్మెల్యే వంగవీటి రాధా టీడీపీలో చేరబోతున్నారంటూ ప్రచారం జరుగుతోన్న సంగతి తెలిసిందే. ఆ పుకార్లకు తగ్గట్లుగానే కొద్ది రోజుల క్రితం యువగళం పాదయాత్రలో పాల్గొని లోకేష్ కు సంఘీభావం తెలిపారు. లోకేష్ అడుగులో అడుగేసిన రాధా పలు విషయాలను ఆయనతో చర్చించారు. ఆ తర్వాత రాధా జనసేనలో చేరబోతున్నారంటూ ప్రచారం జరిగింది.
కానీ, తాజాగా లోకేష్ పాదయాత్రలో రాధా పాల్గొనడంతో ఆ పుకార్లన్నీ పటాపంచలయ్యాయి. యువగళం పాదయాత్ర విజయవాడలో ప్రవేశించిన సందర్భంగా లోకేష్ తో రాధా భేటీ అయ్యారు. రాధా రాజకీయ భవిష్యత్తుపై రకరకాల ఊహాగానాలు వెలువడుతున్న నేపథ్యంలో, ఈ భేటీ ప్రాధాన్యతను సంతరించుకుంది. పాదయాత్రలో లోకేశ్ తో కలిసి రాధా నడుస్తున్న సమయంలో “జై లోకేశ్, జై రాధా” అంటూ కార్యకర్తలు నినాదాలు చేశారు,.
ఇక, లోకేష్ యువగళం పాదయాత్ర ఇవాళ మంగళగిరి నియోజకవర్గం నుంచి ఉమ్మడి కృష్ణా జిల్లాలో ప్రవేశించింది. లోకేష్ రాకతో విజయవాడ టీడీపీ శ్రేణుల్లో కొత్త ఉత్సాహం తొణికిసలాడుతోంది. వారధిపై ఇసకేస్తే రాలనంత జనం లోకేష్ యువగళంలో పాల్గొన్నారు. లోకేష్ రాకతో ప్రకాశం బ్యారేజీ పసుపుమయమైంది. లోకేష్ కు సంఘీభావంగా 150 పడవలతో ప్రకాశం బ్యారేజీలో టీడీపీ కార్యకర్తలు ర్యాలీ చేశారు. తాజాగా లోకష్ తో రాధా భేటీ కావడంతో ఆయన టీడీపీలో చేరడం లాంఛనమే అని ప్రచారం జరుగుతోంది.
