తెలంగాణలో ఎన్నికల సందడి జోరందుకుంది. ఇప్పుడు కాంగ్రెస్ కూడా తొలి జాబితా ప్రకటించేసి రాజకీయ వేడిని మరింత పెంచింది. తొలి జాబితాలో భాగంగా 55 స్థానాల్లో అభ్యర్థులను ప్రకటించేసింది. కాంగ్రెస్ ఎంపీలకు మొదటి జాబితాలోనే చోటు దక్కడం ఇప్పుడు హాట్ టాపిక్ గా మారింది. బలమైన నాయకులు కావడం, ఎన్నికల్లో గెలిచే అవకాశాలు ఉండటంతో ఈ ఎంపీలను అసెంబ్లీ ఎన్నికల బరిలో దింపాలని అధిష్ఠానం నిర్ణయం తీసుకుంది. ఆ ఎంపీలే.. రేవంత్ రెడ్డి, ఉత్తమ్ కుమార్ రెడ్డి, కోమటి రెడ్డి వెంకటరెడ్డి. ఈ ముగ్గురు నాయకులు ఇప్పుడు తెలంగాణ ఎన్నికల్లో తాడోపేడో తేల్చుకునేందుకు సిద్ధమయ్యారు. అంతే కాకుండా ఒకవేళ కాంగ్రెస్ గెలిస్తే సీఎం రేసులోనూ ఈ ముగ్గురు నాయకులే ముందుండే అవకాశాలున్నాయని టాక్.
టీపీసీసీ అధ్యక్షుడు రేవంత్ రెడ్డి మల్కాజిగిరి ఎంపీగా ఉన్నారు. 2009, 2014 ఎన్నికల్లో కొడంగల్ నుంచి టీడీపీ తరపున పోటీ చేసిన రేవంత్ రెడ్డి ఎమ్మెల్యేగా గెలిచారు. కానీ 2018లో కాంగ్రెస్ నుంచి బరిలో దిగి ఓటమి పాలయ్యారు. కానీ 2019 లోక్ సభ ఎన్నికల బరిలో నిలిచి ఎంపీగా గెలుపొందారు. ఇప్పుడు మరోసారి కొడంగల్ నుంచి పోటీ చేసేందుకు సిద్ధమవుతున్నారు. ఈ సారి కాంగ్రెస్ గ్రాఫ్ పెరగడం, టీపీసీసీ అధ్యక్షుడిగా ఉండటంతో రేవంత్ గెలిచేందుకు మెరుగైన అవకాశాలు ఉన్నాయని విశ్లేషకులు చెబుతున్నారు.
మరోవైపు నల్లగొండ ఎంపీ ఉత్తమ్ కుమార్ రెడ్డి కూడా హుజూర్ నగర్ అసెంబ్లీ స్థానం నుంచి పోటీకి సై అంటున్నారు. 1999, 2004లో కోదాడ నుంచి గెలిచిన ఉత్తమ్ 2009 నుంచి హుజూర్ నగర్ కు మకాం మార్చారు. అక్కడి నుంచి 2009, 2014, 2018 ఎన్నికల్లో హుజూర్ నగర్ నుంచి విజయాలు సాధించారు. కానీ 2019 లోక్ సభ ఎన్నికల్లో నల్లొండ నుంచి పోటీ చేసి ఎంపీ అయ్యారు. అనంతరం ఎమ్మెల్యే పదవికి రాజీనామా చేశారు.
ఇక మరో కీలక నేత కోమటిరెడ్డి వెంకటరెడ్డి ప్రస్తుతం భువనగిరి పార్లమెంట్ స్థానానికి ప్రాతినిథ్యం వహిస్తున్నారు. 1999 నుంచి 2014 వరకు వరుసగా నాలుగు సార్లు నల్గొండ ఎమ్మెల్యేగా కోమటిరెడ్డి గెలిచారు. కానీ గత ఎన్నికల్లో ఓటమి పాలయ్యారు. 2019 లోక్ సభ ఎన్నికల్లో భువనగిరి నుంచి గెలిచి ఎంపీ అయ్యారు. ఈ సారి ఎన్నికల్లో కచ్చితంగా నల్గొండ నుంచి ఎమ్మెల్యేగా పోటీ చేస్తానని కోమటిరెడ్డి ముందునుంచే చెబుతున్నారు. అధిష్టానం కూడా ఆయనకు ఇప్పుడు టికెట్ కేటాయించింది.
