నిర్మాతకు సెలబ్రిటీ స్టేటస్ ను తీసుకొచ్చిన ఘనత దిల్ రాజుదే. నిర్మాత అంటే సూట్ కేసు లో డబ్బులు తెచ్చి పెట్టేటోడన్న ఇమేజ్ ను పూర్తిగా మార్చేసిన దిల్ రాజు గురించి ఎంత చెప్పినా తక్కువే. టాలీవుడ్ లో ఎంట్రీ ఇచ్చే ఎంతోమందికి దిల్ రాజు ఒక పాఠ్యపుస్తకంగా నిలుస్తారు. అలాంటి స్టార్ నిర్మాత ఇప్పటికే పలు మూవీలు తీసినా.. బ్లాక్ బస్టర్ మూవీలున్నా.. ఆయన డిస్టిబ్యూటర్ గా వ్యవహరించిన ఒక సినిమా ఆయన జీవితానికి ఒక ఏటీఎంగా మారిన ఆసక్తికర విషయాన్ని తాజాగా వెల్లడించారు.
ఇప్పుడు నడుస్తున్న రీరిలీజ్ కాలంలో ఈ నెల 30న పవన్ కళ్యాణ్ కెరీర్ లోనే భారీ హిట్ మూవీగా నిలిచే తొలిప్రేమ రీ రిలీజ్ కానున్న సంగతి తెలిసిందే. దీనికి సంబంధించిన కార్యక్రమానికి హాజరైన దిల్ రాజు.. ఈ సినిమాతో తనకున్న ప్రత్యేక అనుబంధాన్ని చెప్పుకొచ్చారు. తొలిప్రేమ మూవీతో తనకెన్ని మధుర జ్ఞాపకాలు ఉన్నాయో చెప్పుకొచ్చారు. తన జీవిత చరిత్రలో తొలిప్రేమ సినిమాకు ఒక ఫుల్ పేజీ ఉంటుందని చెప్పటం విశేషం.
ఇండస్ట్రీకి వచ్చిన కొత్తల్లో డిస్ట్రిబ్యూటర్ గా పని చేశానని.. ఈ సినిమాను ఐదేళ్లకు హక్కులు ఉండేలా తాను తీసుకున్నట్లు చెప్పారు. తన జీవితంలో ఎన్నో అద్భుతమైన సినిమాలు తీసినా.. తొలిప్రేమ తనకు ఎంతో స్పెషల్ గా చెప్పుకొచ్చారు. ఈ సినిమా వందో రోజున భారత్ – పాక్ మధ్య క్రికెట్ మ్యాచ్ జరిగిందని.. ఆ రోజు కూడా ఈ సినిమాను చూడటానికి సంధ్య థియేటర్ కు వచ్చిన వైనాన్ని గుర్తు చేసుకున్నారు.
‘ఇలా జరగటం ఒక చరిత్ర. ఈ సినిమా హక్కులు ఐదేళ్లు ఉన్నాయి. దాంతో డబ్బులు తక్కువగా ఉన్న ప్రతిసారీ ఈ సినిమాను రీరిలీజ్ చేసేవాడిని. ఈ రోజు నేను ఈ స్థాయిలో ఉన్నానంటే దానికి ఓ కారణం ఈ సినిమా’ అంటూ దిల్ రాజు మాటల్ని చూస్తే.. ఆయనకు తొలిప్రేమ మూవీ ఒక ఏటీఎంలా మారిందన్న విషయం అర్థమవుతుంది.
