ఐతే ఇప్పుడు విజయ్ తన కొత్త సినిమాకు పెట్టుకున్న టైటిల్ కారణంగా పవర్ స్టార్ పవన్ కళ్యాణ్ అభిమానులకు విలన్ అయిపోయాడు. పవన్ కెరీర్లో అతి పెద్ద హిట్టయిన ‘ఖుషి’తో అభిమానులకు ఉన్న ఎమోషనల్ కనెక్షన్ గురించి తెలిసిందే. అది తమిళంలో అదే పేరుతో తెరకెక్కిన చిత్రానికి రీమేక్ అయినప్పటికీ.. ‘ఖుషి’ పేరెత్తగానే పవన్ అభిమానులు చాలా ఎమోషనల్ అయిపోతారు.
అలాంటి టైటిల్‌ను విజయ్ తన కొత్త చిత్రానికి టైటిల్‌గా పెట్టుకోవడాన్ని పవన్ ఫ్యాన్స్ అస్సలు జీర్ణించుకోలేకపోతున్నారు. దీని గురించి అనధికారిక వార్తలు వచ్చినపుడే వాళ్లు విజయ్ మీద పడిపోయారు. హెచ్చరికలు జారీ చేశారు. ఇప్పుడు ఈ టైటిల్ అధికారికం అయింది. దీంతో మొన్నట్నుంచి విజయ్‌ని సోషల్ మీడియాలో తెగ ట్రోల్ చేస్తున్నారు పవర్ స్టార్ ఫ్యాన్స్. నిజానికి ఈ టైటిల్ ఖరారు చేసింది విజయ్ అని గ్యారెంటీ లేదు.
దర్శకుడు శివ నిర్వాణనే ఇందుకు బాధ్యుడు కావచ్చు. కానీ దర్శకుడు ఆ టైటిల్ పెట్టినా.. తమను దృష్టిలో ఉంచుకుని విజయ్ ‘నో’ చెప్పాల్సిందని పవన్ ఫ్యాన్స్ అంటున్నారు. అలా చేయకుండా తమను కవ్వించడానికే విజయ్ ఇలా చేశాడని వారు ఆరోపిస్తున్నారు. పవన్ టైటిల్ పెట్టుకోవడమే కాక.. పోస్టర్ మీద ‘ది విజయ్ దేవరకొండ’ అని వేసుకోవడం పట్ల కూడా నెటిజన్లలో వ్యతిరేకత వ్యక్తమవుతోంది.
గ్రామర్ ప్రకారం చూస్తే పేర్ల ముందు ‘ది’ పెట్టకూడదు. ఐతే తాను ఒక వ్యక్తిని కాదు.. శక్తిని, వ్యవస్థను అన్నట్లుగా విజయ్ తన పేరు ముందు ‘ది’ పెట్టుకున్నాడని.. అతను హాలీవుడ్ హీరో మాదిరే తన పేరు ముందు ‘ది’ యాడ్ చేసుకున్నాడని.. ఇంత యాటిట్యూడ్ పనికి రాదని అతణ్ని ట్రోల్ చేస్తున్నారు నెటిజన్లు. ఇందులో ప్రధానంగా పవన్ ఫ్యాన్స్ ఉన్నారని ప్రత్యేకంగా చెప్పాల్సిన పని లేదు.
