ఢిల్లీ లిక్కర్ స్కామ్ లో వైసిపి కిలక నేత, రాజ్యసభ సభ్యుడు విజయసాయిరెడ్డి అల్లుడు రోహిత్ రెడ్డి సోదరుడు శరత్ చంద్రా రెడ్డిని ఈడీ అధికారులు అరెస్టు చేసిన సంగతి తెలిసిందే. అంతేకాదు, శరత్ చంద్రారెడ్డి భార్య కనికకు చెందిన జెట్ సెట్ గో సంస్థను కూడా ఈడీ అధికారులు విచారణ జరుపుతున్న సంగతి తెలిసిందే. ఆ సంస్థకు చెందిన ప్రైవేటు చార్టెడ్ ఫ్లైట్లలోనే ఢిల్లీతో పాటు ఇతర రాష్ట్రాలకు, విదేశాలకు భారీగా నల్లడబ్బు తరలిందని ఆరోపణలు రావడం తెలిసిందే. ఈ నేపథ్యంలోనే విజయసాయి రెడ్డిపై టిడిపి అధికార ప్రతినిధి కొమ్మారెడ్డి పట్టాభి చేసిన ట్వీట్ సంచలనం రేపుతోంది.
జగన్ రెడ్డి ముఠా బెజవాడ నుంచి ప్రైవేటు విమానాల్లో విదేశాలకు నల్లధనాన్ని తరలిస్తుందంటూ పట్టాభి సంచలన ఆరోపణలు చేశారు. అయితే, ఆ వ్యాఖ్యలకు స్పందిస్తూ అలా మాట్లాడే గతంలో మాల్దీవులకు పారిపోవాల్సి వచ్చిందంటూ విజయ సాయి ఎద్దేవా చేశారు. తాను పరిగెత్తే టైపు కాదని, మిమ్మల్ని చంచల్ గూడ జైలుకు పరిగెత్తించే టైపు అని పట్టాభి కౌంటర్ ఇచ్చారు.
హోటల్ మేనేజ్ మెంట్ చేసి సర్వర్ గా పనిచేసే పట్టాభిని చంద్రబాబు టీడీపీ నేతను చేశారంటూ విజయసాయి అన్నారు. అయితే, హోటల్లో లక్షలాదిమందికి స్వచ్ఛమైన భోజనం పెట్టిన చరిత్ర తనదని, తప్పుడు లెక్కలు రాసి జైల్లో చిప్పకూడు తిన్న చరిత్ర నీదని పట్టాభి విమర్శించారు. కల్తీ మద్యం దిగమింగి అడ్డంగా దొరికిపోయిన నువ్వు దేహీ అంటూ ఢిల్లీ బూట్లు నాకుతున్నావని పట్టాభి ఆరోపించారు. ఏదేమైనా ట్విట్టర్లో ఇద్దరు నేతల మధ్య మాటల యుద్ధం తార స్థాయికి చేరింది.
