మెగాస్టార్ చిరంజీవి హీరోగా నటించిన గాడ్ ఫాదర్ చిత్రం విడుదలైన అన్ని సెంటర్లలోనూ మంచి వసూళ్లు రాబట్టి హిట్ చిత్రంగా నిలిచింది. అయితే లూసిఫర్ మలయాళం చిత్రం రీమేక్ గా వచ్చిన గాడ్ ఫాదర్ లో చిరంజీవి ఇమేజ్ కు తగ్గట్టుగా పాత్ర తీరు లేదు. అయినా సరే ప్రేక్షకులు ఈ చిత్రానికి బ్రహ్మరథం పట్టారు. ఈ నేపథ్యంలోనే చిరుకి భారీగా ఉన్న మాస్ ఇమేజ్ నేపథ్యంలో తెరకెక్కుతున్న వాల్తేరు వీరయ్య చిత్రంపై భారీ అంచనాలు ఉన్నాయి.
యువ దర్శకుడు బాబీ తెరకెక్కిస్తున్న వాల్తేరు వీరయ్య చిత్రంలో చిరు పాత్ర మాస్ కు…ప్రత్యేకించి చిరు, మెగా అభిమానులకు పూనకాలు తెప్పిస్తుందని టాక్ ఉంది. ఇప్పటికే ఈ చిత్రం నుంచి విడుదలైన చిరు గ్లింప్స్, బాస్ పార్టీ సాంగ్, రవితేజ ఇంట్రో గ్లింప్స్ సోషల్ మీడియాలో ట్రెండ్ అవుతున్నాయి. ఇక, సినిమా విడుదల తేదీ దగ్గర పడుతుండడంతో తాజాగా చిత్ర యూనిట్ ప్రమోషన్స్ జోరు పెంచింది. ఈ నేపథ్యంలోనే తాజాగా ఈ చిత్రం నుంచి మరో లిరికల్ సాంగ్ ను విడుదల చేసింది చిత్ర యూనిట్.
‘నువ్వు శ్రీదేవైతే నేనే చిరంజీవంటా…నువ్వు సీతవైతే నేను రాముడినంటా .. నువ్వు రాధవైతే నేను కృష్ణుడినంటా’ అంటూ సాగే ఈ పాట ప్రస్తుతం ట్రెండింగ్ లో ఉంది. దేవిశ్రీ ప్రసాద్ స్వర పరచి లిరిక్స్ అందించిన ఈ పాటను జస్ప్రీత్ – సమీరా భరద్వాజ్ ఆలపించారు. మంచుకొండల్లోని అందమైన లొకేషన్స్ లో చిత్రీకరించిన ఈ పాట ఆకట్టుకుంటోంది. చిరు, శ్రుతి హాసన్ లు గ్లామరస్ గా కనిపిస్తున్నారు. శేఖర్ మాస్టర్ కొరియోగ్రఫీ అదిరింది.
