కాలం ఎప్పుడూ ఒకేలా ఉండదు. ఒక్కోసారి ఒక వెలుగు వెలిగిన వారు తర్వాతి కాలంలో పత్తా ఉండరు. అందరు పని అయిపోయిందనుకున్న వేళలో.. ఒక్కసారిగా ఎంట్రీ ఇచ్చేసి అదరగొట్టేస్తుంటారు. తాజాగా అలానే చేశారు అందాల భామ శ్రుతిహాసన్.
ఒకప్పుడు టాలీవుడ్ అగ్ర హీరోయిన్లలో ఒకరిగా.. అగ్ర హీరోలతో జత కట్టిన ఆమెకు.. ఆ తర్వాత అవకాశాలు సన్నగిల్లటం తెలిసిందే. కొంతకాలం ఆమెకు సినిమాలే లేని పరిస్థితి. ఒకవేళ.. అవకాశాలు వచ్చినా అరకొర పాత్రలే తప్పించి.. ఆమెకు మరిన్ని అవకాశాలు తెచ్చి పెట్టే క్యారెక్టర్లు రాలేదనే చెప్పాలి.
విశ్వ నటుడు కమల్ హాసన్ కుమార్తెగా ఇండస్ట్రీగా ఎంట్రీ ఇచ్చి తనదైన ముద్రను వేయటంలో ఆమె సక్సెస్ అయ్యారు.2000లో వెండితెరకు ఎంట్రీ ఇచ్చినా.. హీరోయిన్ గా వరుస పెట్టి సినిమాలు చేసింది మాత్రం 2011 నుంచి అనే చెప్పాలి. ఆమె కెరీర్ లో గోల్డెన్ డేస్ అంటే 2012 నుంచి 2015 వరకు చెప్పాలి. వివిధ భాషల్లో హీరోయిన్ గా తన సత్తా చాటిన ఆమె.. గడిచిన మూడేళ్లుగా అవకాశాలు తలుపు తడుతున్నాయి.
తాజాగా సంక్రాంతి సందర్భంగా ఆమె అరుదైన రికార్డును తన సొంతం చేసుకున్నారు. రోజు తేడాతో విడుదల అవుతున్న అగ్రహీరోల సినిమాల్లో హీరోయిన్ గా ఆమె అరుదైన రికార్డును సొంతం చేసుకుంటున్నారు. సంక్రాంతి బరిలో తెలుగులో విడుదలవుతున్న సినిమాల్లో భారీ బజ్ ఇస్తున్న బాలయ్య వీరసింహారెడ్డి.. మెగాస్టార్ చిరంజీవి వాల్తేరు వీరయ్య.. ఈ రెండు మూవీల్లో శ్రుతిహాసన్ హీరోయిన్ గా వ్యవహరిస్తున్నారు.
ఈ రోజు (జనవరి 12) వీరసింహారెడ్డి రిలీజ్ అవుతుంటే.. రేపు (జనవరి 13)న చిరు వాల్తేరు వీరయ్య థియేటర్లలో సందడి చేయనుంది. సంక్రాంతి సందర్భంగా విడుదలైన రెండు సినిమాల్లో ఒకే హీరోయిన్ అన్న విషయంలో గతంలో ఎవరికి ఇలాంటి అవకాశం లభించలేదని.. అంటున్నారు.
మరో ఆసక్తికరమైన విషయం ఏమంటే.. ఈ రెండు మూవీలకు నిర్మాతలు మైత్రి మూవీస్ వారే కావటం విశేషం. అయితే.. ఇలాంటివి శ్రుతి కెరీర్ ను చూస్తే మరికొన్ని కనిపిస్తాయి. ఒకే రోజు విడుదలైన రెండు సినిమాల్లోనూ ఆమె హీరోయిన్ గా ఉన్న రికార్డు కూడా ఆమె సొంతంగా చెప్పాలి.
2013 జులైన 19న ఒకే రోజున ఆమె నటించిన రామయ్యా వస్తావయ్యా, డి-డే రెండు చిత్రాలు ఒకే రోజు విడుదలయ్యాయి. నువ్వొస్తానంటే నేనొద్దంటానా రీమేక్ గా రూపొందించినచిత్రం రామయ్యా వస్తావయ్యాగా రిలీజ్ అయ్యింది. ఈ చిత్రానికి హీరోగా గిరీశ్ కుమార్ వ్యవహరిస్తున్నారు. ఇక.. రిషి కపూర్.. ఇర్ఫాన్ ఖాన్.. అర్జున్ రాంపాల్ ప్రధానపాత్రలు పోషించిన యాక్షన్ థ్రిల్లర్ చిత్రం డి-డేలో శుత్రిహసన్ హీరోయిన్ గా నటించారు.
అంతేకాదు.. కరోనా మహమ్మారి తర్వాత విడుదలై టాలీవుడ్ కు కొత్త ఉత్సాహాన్ని ఇచ్చిన రవితేజ క్రాక్ మూవీలోనూ ఆమె నటించారు. ఈ మూవీ జనవరి 9న విడుదల కాగా.. కేవలం ఐదు రోజుల వ్యవధిలోనే ఆమె నటించిన హిందీ మూవీ ది పవర్ జనవరి 14న ఓటీటీలో విడుదలైంది. ఇలాంటివి శ్రుతికి మాత్రమే సాధ్యమని చెప్పాలి.
