ఐకాన్ స్టార్ అల్లు అర్జున్, విలక్షణ దర్శకుడు సుకుమార్ ల కాంబోలో వచ్చిన ‘ పుష్ప-1’ చిత్రం బాక్సాఫీస్ దగ్గర వసూళ్ల మోత మోగిస్తోన్న సంగతి తెలిసిందే. హిట్ టాక్ తో దూసుకుపోతున్న ఈ చిత్రం ఇప్పటికే రూ.173 కోట్లు కొల్లగొట్టి 200 కోట్ల క్లబ్ లో చేరేందుకు రెడీగా ఉంది. ఇక, ఈ చిత్రంలో టాలీవుడ్ స్టార్ హీరోయిన్ సమంత చేసిన ఐటెం సాంగ్ ‘ఊ అంటావా..ఊ ఊ అంటావా’ యూట్యూబ్ లో దుమ్మురేపుతోంది.
ఈ సందర్భంగానే సమంతపై కొందరు సోషల్ మీడియాలో ట్రోల్ చేస్తున్న సంగతి తెలిసిందే. మగవారంతా చెడ్డవారే అన్న అర్ధం వచ్చేలా ఉన్న ఆ పాటలో సమంత శృతిమించి అందాలను ఆరబోసిందని నెటిజన్లు ట్రోల్ చేస్తున్నారు. అయితే, సినిమాను సినిమాలా చూడాలని, ఆ పాటలో సామ్ చాలా సెక్సీగా కనిపించడమే కాకుండా అద్భుతంగా డ్యాన్స్ చేసిందని మరికొందరు కాంప్లిమెంట్లు ఇస్తున్నారు.
ఈ క్రమంలోనే ఆ పాటపై సామ్ స్పందించింది. సెక్సీగా ఉండటానికి నెక్ట్‌ లెవల్‌ హార్డ్‌ వర్క్‌ చేయాలని షాకింగ్‌ కామెంట్స్ చేసింది. తాను మంచి క్యారెక్టర్లు చేశాననని, చెడ్డ రోల్స్ కూడా చేశానని, కొన్ని సందర్భాల్లో సీరియస్‌ క్యారెక్టర్లు, కొన్ని సినిమాల్లో కామెడీ చేసి నవ్వించానని సామ్ చెప్పింది. తాను తీసుకునే ప్రతి నిర్ణయంలో రాణించడానికి శ్రమిస్తున్నానని, కానీ సెక్సీగా ఉండటానికి దానికి మించిన స్థాయిలో హార్డ్‌ వర్క్‌ చేయాలని సామ్ షాకింగ్‌ కామెంట్స్ చేసింది. ఏది ఏమైనా..ఆ పాటపై సామ్ ‘సెక్సీ’ కామెంట్స్…వైరల్ అయ్యాయి.
