తెలుగులో అత్యంత విజయవంతమైన వెబ్ సిరీస్ అంటే..90’s ఎ మిడిల్ క్లాస్ బయోపిక్. ఒక రకంగా చెప్పాలంటే తెలుగులో బెస్ట్ వెబ్ సిరీస్ కూడా ఇదే. కేవలం ఈ ఒక్క ఒరిజినల్‌తో ఈటీవీ విన్ యాప్ ఏకంగా 5 లక్షలకు పైగా సబ్‌స్క్రైబర్లను సంపాదించింది. ఆ ఓటీటీ నిలబడడానికి ఈ సిరీసే ప్రధాన కారణం.
ఆదిత్య హాసన్ అనే కొత్త దర్శకుడు రూపొందించిన సిరీస్ ఇది. తక్కువ బడ్జెట్లో, బలమైన కంటెంట్‌తో ప్రేక్షకుల మనసులు గెలిచాడు ఆదిత్య. దీని తర్వాత ‘ప్రేమలు’ డబ్బింగ్ వెర్షన్‌కు అదిరిపోయే డైలాగులు రాసి ప్రశంసలు అందుకున్నాడతను. ఇప్పుడు తన రెండో వెబ్ సిరీస్‌కు రెడీ అయ్యాడు ఆదిత్య. నిన్ననే దాని గురించి అనౌన్స్‌మెంట్ కూాడా వచ్చేసింది.
ఇంకా పేరు ఖరారు కాని ఈ వెబ్ సిరీస్‌లో బాహుబలి ఫేమ్ నిఖిల్ దేవాదుల హీరోగా నటించనున్నాడు. ‘బాహుబలి’లో యంగ్ ప్రభాస్‌గా నటించింది ఈ కుర్రాడే. అదే కాక చాలా సినిమాల్లో బాల నటుడిగా నటించాడు. అతను ఇప్పుడు ఆదిత్య కొత్త వెబ్ సిరీస్‌లో హీరోగా చేయబోతున్నాడు. ‘కేరాఫ్ కంచరపాలెం’ సహా పలు చిత్రాల్లో బాల నటిగా చేసిన నిత్యశ్రీ గోరు ఇందులో హీరోయిన్‌గా చేయబోతోంది. ‘నైంటీస్ మిడిల్ క్లాస్’ను ప్రొడ్యూస్ చేసిన దర్శకుడు నవీన్ మేడారంయే ఈ సిరీస్‌ను కూడా నిర్మించబోతున్నాడు.
ముందు ప్రొడక్షన్ చేశాక ఈ సిరీస్‌ను ఎవరికి ఇవ్వాలన్నది నిర్ణయించబోతున్నారు. బహుశా ఈటీవీ విన్ వాళ్లే మంచి రేటు ఇచ్చి తీసుకోవచ్చు. మరి ‘నైంటీస్ మిడిల్ క్లాస్’ తరహాలోనే మరోసారి ఆదిత్య మ్యాజిక్ చేస్తాడేమో చూడాలి.
