మాస్ కా బాప్, నందమూరి నటసింహా బాలకృష్ణ హోస్ట్ గా వ్యవహరిస్తున్న Unstoppable సీజన్ 2 రికార్డు టిఆర్పి రేటింగ్ తో దూసుకుపోతున్న సంగతి తెలిసిందే.
రెండో సీజన్ తొలి ఎపిసోడ్ కు టిడిపి అధినేత నారా చంద్రబాబునాయుడుతో పాటు ఆయన తనయుడు, బాలకృష్ణ అల్లుడు నారా లోకేష్ హాజరు కావడం సంచలనం రేపింది.
ఆ షోలో తన బావ, అల్లుడులతో బాలయ్య బాబు చేసిన సందడి వైరల్ గా మారింది.
ఇక, ఆ తర్వాత రెండో ఎపిసోడ్ లో యంగ్ హీరోలు విశ్వక్సేన్, సిద్ధు జొన్నలగడ్డలను ఆహ్వానించిన బాలయ్య వారితో షో అదరగొట్టారు.
డీజే టిల్లు, ఫలక్ నామా దాస్ లతో కలిసి బాలయ్య చేసిన సందడి అంతా అంతా కాదు.
ఈ నేపథ్యంలోనే త్వరలోనే ఈ షోకు పవర్ స్టార్ పవన్ కళ్యాణ్ తో పాటు విలక్షణ దర్శకుడు త్రివిక్రమ్ శ్రీనివాస్ కూడా హాజరు కాబోతున్నట్టుగా ప్రచారం జరుగుతోంది.
సిద్ధుతో ఎపిసోడ్లో త్రివిక్రమ్ శ్రీనివాస్ కి ఫోన్ చేసిన బాలయ్య ఈ షోకి ఎప్పుడు వస్తున్నావు అంటూ ప్రశ్నించడం వైరల్ గా మారింది.
అయితే మీరు ఎప్పుడు అంటే అప్పుడు వస్తానంటూ త్రివిక్రమ్ సమాధానం చెప్పడం, నీతోపాటు ఎవరిని తీసుకురావాలో తెలుసుగా అంటూ బాలయ్య అనడం సంచలనంగా మారింది.
దీంతో, త్రివిక్రమ్, పవన్ లు కలిసి బాలయ్య షోలో సందడి చేయబోతున్నట్టుగా తెలుస్తోంది.
ఈ నేపథ్యంలోనే ఈ సీజన్లో ఏదో ఒక ఎపిసోడ్ లో వైసీపీ ఫైర్ బ్రాండ్ నేత, మంత్రి రోజాతో బాలయ్య సందడి చేయబోతున్నట్టుగా ఊహాగానాలు వినిపిస్తున్నాయి.
గతంలో హీరోయిన్ గా ఓ వెలుగు వెలిగిన రోజా…బాలయ్యతో కలిసి పలు చిత్రాల్లో నటించారు.
వైరి పార్టీల్లో ఉన్నప్పటికీ సినీ రంగానికి చెందిన బాలయ్యతో రోజా టచ్ లోనే ఉన్నట్టుగా తెలుస్తోంది.
కొద్ది నెలల క్రితం బాలయ్యతో కలిసి కొందరు వైసిపి ఎమ్మెల్యేలు తీసుకున్న సెల్ఫీలలో రోజా కూడా ఉన్నారు.
దీంతో రాజకీయాలు వేరు సినిమా వేరని, ఈ షోలో ఎపిసోడ్ కు రోజా కూడా వచ్చే అవకాశం ఉందని ప్రచారం జరుగుతోంది.
అంతేకాదు, రోజాను ఈ షోలో పాల్గొనేందుకు అల్లు అరవింద్ ఒప్పించే ప్రయత్నం చేస్తున్నారని కూడా తెలుస్తోంది.
ఒకవేళ రోజా ఈ షోలో పాల్గొనేందుకు అంగీకరిస్తే బాలయ్య, రోజాల కాంబినేషన్లో రాబోయే ఎపిసోడ్ కచ్చితంగా వైరల్ గా మారుతుంది అనడంలో ఎటువంటి సందేహం లేదు.
