మాజీ మంత్రి రావెల కిశోర్ బాబు తిరిగి సొంతగూటికి వచ్చేందుకు ప్రయత్నిస్తున్నట్లు కొంతకాలంగా ప్రచారం జరుగుతోన్న సంగతి తెలిసిందే. బీజేపీలో ఉన్న రావెల…త్వరలోనే టీడీపీలో చేరబోతున్నారనే వార్తలు వినిపిస్తున్నాయి. ఈ క్రమంలోనే టీడీపీ అధినేత చంద్రబాబుతో రావెల కొద్ది రోజుల క్రితం భేటీ కావడం చర్చనీయాంశమైంది. చంద్రబాబుతో రావెల భేటీ నేపథ్యంలో టీడీపీలో రావెల చేరిక ఖాయమని తెలుస్తోంది.
ఈ క్రమంలోనే తాజాా రావెల్ కిశోర్ బాబు బీజేపీకి రాజీనామా చేయడం చర్చనీయాంశమైంది. తన రాజీనామా లేఖను ఏపీ బీజేపీ అధ్యక్షుడు సోము వీర్రాజుకు రావెల పంపించారు. వ్యక్తిగత కారణాలతో తాను రాజీనామా చేస్తున్నట్టు రావెల లేఖలో పేర్కొన్నారు. బీజేపీ రాష్ట్ర ఉపాధ్యక్షుడిగా ఉన్న రావెల…గత కొంత కాలంగా పార్టీ కార్యకలాపాలకు దూరంగా ఉంటున్నారు. ఈ క్రమంలోనే రావెల బీజేపీని వీడడం ఆ పార్టీకి ఎదురు దెబ్బ అని చెప్పవచ్చు.
ఐఆర్ఎస్ అధికారిగా పని చేసిన రావెల కిశోర్ బాబు 2014 ఎన్నికలకు ముందు టీడీపీలో చేరి గుంటూరు జిల్లా ప్రత్తిపాడు నియోజకవర్గం నుంచి గెలుపొందారు. తొలిసారి ఎమ్మెల్యేగా గెలిచినప్పటికీ చంద్రబాబు ఆయనకు మంత్రి పదవిని కట్టబెట్టి సముచిత స్థానాన్ని కల్పించారు. అయితే ఆ తర్వాత పలు కారణాల వల్ల మంత్రివర్గ విస్తరణలో ఆయన పదవిని కోల్పోయారు. ఆ తర్వాత 2019 ఎన్నికలకు ముందు ఆయన టీడీపీకి గుడ్ బై చెప్పి… జనసేనలో చేరారు. మళ్లీ ప్రత్తిపాడు నియోజకవర్గం నుంచే పోటీ చేసి ఓటమిపాలయ్యారు. ఆ తర్వాత జనసేనకు గుడ్ బై చెప్పి, బీజేపీలో చేరారు.
