ఈ ఏడాది సంక్రాంతి కానుకగా విడుదలైన ‘హనుమాన్’ సినిమా ఎంతటి సంచలనం రేపిందో తెలిసిందే. పెద్ద సినిమాల మధ్య చిన్న సినిమాగా విడుదలైన ఈ చిత్రం.. చాలా పెద్ద రేంజికి వెళ్లిపోయింది. ఏకంగా రూ.300 కోట్లకు పైగా వసూళ్లతో పాన్ ఇండియా స్థాయిలో బ్లాక్ బస్టర్‌గా నిలిచింది. ఈ సినిమాతో దర్శకుడు ప్రశాంత్ వర్మ పేరు మార్మోగిపోయింది. ‘హనుమాన్’ చివర్లో దీని సీక్వెల్ ‘జై హనుమాన్’ కు లీడ్ కూడా ఇచ్చిన సంగతి తెలిసిందే. ఇక అప్పట్నుంచి ‘జై హనుమాన్’లో హనుమంతుడి పాత్ర ఎవరు చేస్తారనే విషయంలో విపరీతమైన సస్పెన్స్ నడిచింది. ఇటీవలే దీపావళికి ఆ సస్పెన్స్ వీడిపోయింది. ‘కాంతార’తో మాంచి పాపులారిటీ సంపాదించిన కన్నడ నటుడు రిషబ్ శెట్టి హనుమంతుడిగా ఫస్ట్ లుక్ పోస్టర్ లాంచ్ చేయడంతో మంచి రెస్పాన్స్ వచ్చింది.
కాగా ‘జై హనుమాన్’లో రిషబ్ మాత్రమే కాకుండా టాలీవుడ్ స్టార్ రానా దగ్గుబాటి కూడా కనిపించబోతున్నట్లు తెలుస్తోంది. ఈ మేరకు దర్శకుడు ప్రశాంత్ వర్మే స్వయంగా సంకేతాలు ఇచ్చాడు. తాజాగా అతను రిషబ్ శెట్టి, రానాలతో కలిసి ఒక ఫొటోను ట్విట్టర్లో షేర్ చేశాడు. దానికి ‘జై జై హనుమాన్’ అనే హ్యాష్ ట్యాగ్ కూడా జోడించాడు. ఇది క్యాజువల్ ఫొటో అనుకోవడానికి లేదు.
రానా కూడా ఈ సినిమాలో నటిస్తుండడం వల్లే ఇలాంటి క్యాప్షన్ పెట్టి ప్రశాంత్ ఈ పోస్టు పెట్టాడని భావించవచ్చు. మరి రానా ఇందులో ఏం పాత్ర పోషిస్తున్నాడన్నది ఆసక్తికరం. అతనేమైనా రాముడి పాత్రలో కనిపిస్తాడేమో చూడాలి. అసలు హనుమంతుడి పాత్రలో రానా నటిస్తే ఇంకా బాగుండేదన్న అభిప్రాయాలు కూడా ఉన్నాయి. కానీ ప్రశాంత్ మాత్రం రిషబ్‌ను ఎంచుకున్నాడు. మరి రానా ఈ చిత్రంలో ఎలా మెరుస్తాడన్నది ఆసక్తికరం. ఈ చిత్రం వచ్చే ఏడాది చివర్లో విడుదలయ్యే అవకాశముంది.
