జనసేన అధినేత పవన్ కల్యాణ్ కు ఓటు వేయాలంటూ పిఠాపురం ప్రజలకు మెగాస్టార్ చిరంజీవి వీడియో సందేశమిచ్చిన సంగతి తెలిసిందే. ఈ క్రమంలోనే తాజాగా తన బాబాయి పవన్ కల్యాణ్ ను గెలిపించాలని గ్లోబల్ స్టార్ రామ్ చరణ్ కూడా కోరారు. ‘‘మీ భవిష్యత్ కోసం పాటు పడే నాయకుడు పవన్ కల్యాణ్ గారిని గెలిపించండి’’ అని రామ్ చరణ్ పిలుపునిచ్చారు. తాను జనసేన పార్టీకి మద్దతు ఇస్తున్నానని చెర్రీ అన్నారు.
కాగా, జనసేనాని పవన్ కల్యాణ్ కు టాలీవుడ్ హీరో, నేచురల్ స్టార్ నాని కూడా మద్దతు ప్రకటించారు. ప్రజా సేవ కోసం రాజకీయాల్లోకి అడుగుపెట్టిన పవన్ కల్యాణ్ ఈ ఎన్నికల్లో గెలవాలని నాని ఆకాంక్షించారు. పిఠాపురం అసెంబ్లీ పోరులో తలపడుతున్న పవన్ కు నాని ఆల్ ది బెస్ట్ చెప్పారు. సినీ కుటుంబంలో ఒకడిగా పవన్ కల్యాణ్ కు మద్దతు పలుకుతున్నానని అన్నారు. ఈ ఎన్నికల పోరాటంలో పవన్ గెలవాలని, ప్రజలకు ఇచ్చిన హామీలన్నీ నిలబెట్టుకోవాలని, ఆల్ ది వెరీ బెస్ట్ సర్ అని నాని ట్వీట్ చేశారు. ఫిల్మ్ ఇండస్ట్రీ మద్దతు కూడా పవన్ కల్యాణ్ కే ఉంటుందని ఆశాభావం వ్యక్తం చేశారు.
మరోవైపు, ఖమ్మంలో కాంగ్రెస్ పార్టీ అభ్యర్థి రామసహాయం రఘురాంరెడ్డికి మద్దతుగా ప్రముఖ సినీ నటుడు విక్టరీ వెంకటేశ్ ప్రచారం నిర్వహించారు. మంగళవారం సాయంత్రం ఖమ్మంలో నిర్వహించిన రోడ్ షోలో వెంకటేష్ పాల్గొన్నారు. దీంతో, ఈ రోడ్ షోలో వెంకటేశ్ అభిమానులు, కాంగ్రెస్ కార్యకర్తలు వేలాదిగా తరలివచ్చారు. రామసహాయం రఘురాం రెడ్డిని భారీ మెజార్టీతో గెలిపించాలని ఓటర్లకు వెంకీ మామా విజ్ఞప్తి చేశారు. ఈ ఎన్నికల ప్రచారంలో వెంకటేశ్‌తో పాటు మంత్రి పొంగులేటి శ్రీనివాస్ రెడ్డి పాల్గొన్నారు. కాంగ్రెస్ అభ్యర్థి రఘురాంరెడ్డికి వెంకటేశ్ వియ్యంకుడు.
