టాలీవుడ్ లోని స్టార్ హీరోలలో ఒకడిగా వెండితెరపై వెలిగిపోతున్న జూనియర్ ఎన్టీఆర్…’బిగ్ బాస్’, ‘ఎవరు మీలో కోటీశ్వరులు’ వంటి రియాలిటీ షోలకు హోస్ట్ గా వ్యవహరించి బుల్లితెర ప్రేక్షకులనూ ఆకట్టుకున్నాడు. ‘ఆర్ఆర్ఆర్’ వంటి భారీ పాన్ ఇండియా మల్టీ స్టారర్ లో కొమురం భీంగా నటిస్తోన్న తారక్…’ఎవరు మీలో కోటీశ్వరులు’తో ప్రేక్షకులను టీవీ సెట్ ల ముందు కట్టిపడేస్తున్నారు. ఆట నాది…కోటి మీది అంటూ తారక్ మొదలుబెట్టిన ఈ షోకు మంచి ఆదరణ లభిస్తోంది. ఆల్రెడీ ఈ షోలో గెస్ట్గ్ గా ‘ఆర్ఆర్ఆర్’ లో అల్లూరి సీతారామరాజుగా నటిస్తోన్నరామ్ చరణ్ తేజ్ పాల్గొని అలరించారు.
ఇక, తాజాగా టాలీవుడ్ దర్శక ధీరుడు, ఏస్ డైరెక్టర్ రాజమౌళి కూడా ఈ షోలో తారక్ ముందు హాట్ సీట్ లో కూర్చోబోతున్నారని తెలుస్తోంది.
“ఆర్ఆర్ఆర్” సినిమా షూటింగ్ పూర్తవడంతో ప్రస్తుతం డబ్బింగ్ పనులపై జక్కన్న ఫోకస్ చేశారు. దీంతోపాటు, ఆ చిత్రం పోస్ట్ ప్రొడక్షన్ పనులు శరవేగంగా జరుగుతున్నాయి. దీంతో, రాజమౌళి అన్నపూర్ణ స్టూడియోస్‌లో బిజీబిజీగా ఉన్నారు. అయితే, ‘ఎవరు మీలో కోటీశ్వరులు’ షూటింగ్ కూడా అన్నపూర్ణ స్టూడియోస్ లో జరుగుతోంది.
అయితే, పోస్ట్ ప్రొడక్షన్ పనుల్లో బిజీగా ఉన్న రాజమౌళి…ఎటూ అన్నపూర్ణ స్టూడియోలో ఉన్నారు కాబట్టి…పనిలో పనిగా తారక్ షోలో గెస్ట్ గా కనిపిస్తే బాగుంటుందని షో నిర్వాహకులు భావించారట. దీనికితోడు తారక్ తో జక్కన్నకున్న అనుబంధం నేపథ్యంలో షోలో పార్టిసిపేట్ చేయడానికి జక్కన్న అంగీరరించాని పుకార్లు వినిపిస్తున్నాయి. ఈ క్రమంలోనే రాజమౌళి కారు దిగి స్టూడియోలోకి వెళ్తున్న ఓ ఫొటో, వీడియో సోషల్ మీడియాలో వైరల్ అయ్యాయి.
ఇక, ఆ ఫొటోల్లో దర్శక దిగ్గజం రాఘవేంద్రరావు కూడా కన్పించారు. తారక్ తో దర్శకేంద్రుడు మాట్లాడుతున్న ఫొటో కూడా ఆసక్తి రేపుతోంది. ఇక, రాఘవేంద్రరావుతో మాట్లాడుతున్నపుడు తారక్…షో కోసం వేసుకునే కాస్ట్యూమ్స్ తోనే ఉండడం విశేషం. దీంతో, జక్కన్నతోపాటు దర్శకేంద్రుడు కూడా వినాయక చవితి స్పెషల్ షోలో పాల్గొనబోతున్నారంటూ ఊహాగానాలు వినిపిస్తున్నాయి. మరి, ఈ పుకార్లలో నిజానిజాలు తెలియాలంటే మరి కొంతకాలం వేచి చూడక తప్పదు.
