తిరుమల లడ్డు వ్యవహారం ప్రస్తుతం దేశవ్యాప్తంగా చర్చనీయాంశం అవుతున్న సంగతి తెలిసిందే. లడ్డు గొడవ మీద సరదాగా స్పందించినా, విమర్శలు చేసినా ఆయన ఊరుకోవట్లేదు. సోమవారం హైదరాబాద్‌లో జరిగిన ‘సత్యం సుందరం’ ప్రి రిలీజ్ ఈవెంట్లో కార్తి సరదాగా చేసిన వ్యాఖ్యల మీద కూడా ఏపీ డిప్యూటీ సీఎం పవన్ కల్యాణ్ కొంచెం సీరియస్‌గానే మాట్లాడారు. లడ్డు విషయం సెన్సిటివ్ అని.. అది మనకు వద్దు అని కార్తి పేర్కొనగా.. పవన్ ఈ వ్యాఖ్యలను తప్పుబట్టారు. ఈ విషయంపై సినిమా వాళ్లు సానుకూలంగా మాట్లాడాలని.. లేదంటే మౌనంగా ఉండాలని.. జోకులేస్తే బాగుండదని పవన్ వ్యాఖ్యానించాడు.
దీంతో కార్తి ఈ విషయమై ‘ఎక్స్’లో పోస్ట్ పెట్టాడు. తన వ్యాఖ్యలు ఇబ్బంది పెట్టి ఉంటే మన్నించాలని కోరాడు. ఎవరి మనోభావాలనూ కించపరిచే ఉద్దేశం లేదన్నాడు. తాను కూడా వేంకటేశ్వరస్వామి భక్తుడినేనని కార్తి ఈ సందర్భంగా చెప్పాడు. మరోవైపు పవన్ లడ్డు వివాదానికి మతం రంగు పులిమి జాతీయ స్థాయి గొడవగా మారుస్తుండడాన్ని ప్రకాష్ రాజ్ ‘ఎక్స్’లో తప్పుబట్టిన సంగతి తెలిసిందే. దీనిపై కూడా పవన్ స్పందించాడు. ఈ విషయం గురించి తాము స్పందించకూడదా అని ప్రకాష్ రాజ్‌ను ప్రశ్నించారు.
దీంతో ప్రకాష్ రాజ్ ‘ఎక్స్’ వేదికగా పవన్ వ్యాఖ్యలపై మాట్లాడారు. తాను ప్రస్తుతం షూటింగ్ రీత్యా దూరంగా ఉన్నానని.. తిరిగి వచ్చాక పవన్ అడిగిన ప్రతి ప్రశ్నకూ సమాధానం చెబుతానని అన్నారు. ఈలోపు తన ట్వీట్‌ను పవన్ కళ్యాణ్ మరోసారి చదువుకోవాలని సూచించారు. ఈ ఇష్యూలో పవన్ కళ్యాణ్ ఇంత తీవ్రంగా స్పందిస్తుండడం ఒకింత ఆశ్చర్యానికి గురి చేస్తోంది.
