భాష్యం ప్రవీణ్. ఇప్ప‌టి వరకు పెద్ద‌గా ఎవ‌రికీ తెలియ‌ని పేరు. కొన్నాళ్లుగా టీడీపీ టికెట్ల రేసులో మాత్రం ఉన్నార‌నేది గుంటూరు, కృష్ణా జిల్లాల ప్ర‌జ‌ల‌కు మాత్ర‌మే తెలుసు. ఇప్పుడు టీడీపీ అధినేత చంద్రబాబు ఇచ్చిన 34 మందితో కూడిన రెండో అభ్య‌ర్థుల జాబితాలో భాష్యం ప్ర‌వీణ్‌కు టికెట్ ద‌క్కింది. ఈయ‌న‌ను ఉమ్మ‌డి గుంటూరు జిల్లాలోని పెద‌కూర‌పాడు నియోజ‌క‌వ‌ర్గం నుంచి పోటీకి రంగంలోకి దింపారు. జిల్లాలోనే కాదు ఏపీ రాజ‌ధాని ప్రాంతం అమ‌రావ‌తి ఉన్న కీలక నియోజ‌క‌వ‌ర్గం అయిన పెద‌కూర‌పాడు సీటు ద‌క్కించుకున్న భాష్యం ప్రవీణ్ పేరు ఇప్పుడు ఏపీలోనే మార్మోగుతోంది.
గుంటూరు జిల్లాలో ఉన్న సీనియ‌ర్ నేత‌లు, రాజ‌కీయ ఉద్దండులతో పాటు సీటు ద‌క్కించుకున్న ప్రవీణ్ ఇప్పుడు గుంటూరు జిల్లా రాజ‌కీయాల్లో యంగ్ ఎన‌ర్జిటిక్ లీడ‌ర్‌గా తెర‌మీద‌కు వ‌చ్చారు.
స్థానికంగా ఉన్న యువ‌త‌తో ఈయ‌న‌కు మంచి స‌త్సంబంధాలు ఉండ‌డం క‌లిసి వ‌స్తున్న విష‌యం.` భాష్యం ` విద్యాసంస్థ‌ల అధినేతకు ప్రవీణ్ బంధువు. ప‌లు వ్యాపారాల్లో కూడా ప్రవీణ్ పెట్టుబ‌డులు పెట్టా రు. ఆర్థికంగాబ‌లంగా ఉన్న నాయ‌కుడు. రియ‌ల్ ఎస్టేట్ రంగంలో మంచి ఊపు మీదున్న నాయ‌కుడు కూడా. గ‌త ఐదేళ్ల నుంచి ఆయ‌న రాజ‌కీయాల్లో యాక్టివ్‌గా ఉంటున్నారు. చాలా త‌క్కువ టైంలోనే త‌న వ్యాపార రంగంలో తిరుగులేని స‌క్సెస్ అయిన ప్రవీణ్.. ఇటు తెలుగుదేశం పార్టీలో కూడా చాలా స్పీడ్‌గా ఎద‌గ‌డంతో పాటు చంద్రబాబు, లోకేష్ ద‌గ్గ‌ర మంచి మార్కులు వేయించుకున్నారు.
ముఖ్యంగా నారా లోకేష్‌కు ప్రవీణ్ అత్యంత స‌న్నిహితుడుగా పేరు తెచ్చుకున్నారు. నారా లోకేష్ ఏ పిలు పు ఇచ్చినా.. నేనున్నానంటూ కార్య‌క్ర‌మాలు చేప‌డుతుంటారు. తొలుత ప్రవీణ్ చూపు చిల‌క‌లూరిపేట పై ఉండేది. దీంతో ఇక్క‌డ పెద్ద ఎత్తున సేవా కార్య‌క్ర‌మాలు నిర్వ‌హించారు. త‌న సాయం కోరి ఎవ‌రు వ‌చ్చి నా.. కాద‌నకుండా చేయ‌డం ప్రవీణ్ ప్ర‌త్యేక‌త. ఇదే ఆయ‌న‌ను పేద‌ల మ‌నిషిగా సేవా గుణం ఉన్న యువ నేత‌గా నిలిపింది. దీనిపై నారా లోకేష్ నుంచి కూడా అనేక సంద‌ర్భాల్లో ప్ర‌శంస‌లు అందుకున్నారు.
జిల్లాలో యువ‌గ‌ళం నిర్వ‌హించిన‌ప్పుడు భాష్య ప్రవీణ్.. స‌ర్వం తానే అయి వ్య‌వ‌హ‌రించారు. అంతేకాదు.. పార్టీ కార్య‌క‌ర్త‌ల స‌హాయ నిధికి కూడా.. 73 ల‌క్ష‌ల రూపాయ‌ల విరాళం ఇచ్చారు. ఇవ‌న్నీ.. నారా లోకేష్‌ను అమితంగా ఆక‌ట్టుకున్నాయి. ఈ క్ర‌మంలోనే ఆయ‌న‌కు ఇంత పోటీలో కూడా టికెట్ వ‌చ్చింద‌నే చ‌ర్చ సాగుతోంది. అంతేకాదు.. యువ‌త‌ను ఆక‌ర్షించ‌డంలోనూ ప్రవీణ్ ముందుంటారు. వారికి అన్ని విధాలా అండ‌గా కూడా ఉంటున్నారు. ప్ర‌స్తుతం పెద‌కూర‌పాడు టికెట్ కేటాయించ‌డంతో భాష్యం ప్రవీణ్ స‌రికొత్త రాజ‌కీయ జ‌ర్నీ మొద‌లు కానుంది.
