ఏపీలో ఎన్డీఏ కూటమి 164 సీట్లతో అఖండ విజయం సాధించిన సంగతి తెలిసిందే. ఏపీలో టీడీపీ, జనసేన, బీజేపీల కలయికలో ఎన్డీఏ కూటమి ఏర్పాటులో జనసేనాని పవన్ కల్యాణ్ కీలక పాత్ర పోషించడం, 21కి 21 స్థానాల్లో విజయం సాధించి సత్తా చాటడంతో మెగా ఫ్యామిలీతో పాటు మెగా అభిమానులు హర్షం వ్యక్తం చేస్తున్నారు. ఈ క్రమంలోనే ఎన్నికలలో అఖండ విజయం సాధించిన పవన్ కల్యాణ్ ..తొలిసారి మెగా ఫ్యామిలీని సతీసమేతంగా కలిశారు.
మెగాస్టార్ చిరంజీవి ఇంటికి వచ్చిన పవన్ కల్యాణ్ కు హీరో రామ్ చరణ్ ఘన స్వాగతం పలికారు. పవన్ కల్యాణ్, ఆయన సతీమణి అన్నా లెజ్నోవా, పవన్ తనయుడు అకీరానందన్ లపై మెగా ఫ్యామిలీ పూల వర్షం కురిపించింది. రామ్ చరణ్, వరుణ్ తేజ్, వదిన సురేఖ తదితరులు పవన్ ను ఆలింగనం చేసుకున్నారు. పవన్ కల్యాణ్ దంపతులకు హారతితో స్వాగతం పలికారు. తన మాతృమూర్తి అంజనా దేవి, అన్నయ్య చిరంజీవి, వదిన సురేఖలకు పాదాభివందనం చేసిన పవన్ కల్యాణ్ వారి ఆశీర్వాదం తీసుకున్నారు.
అప్యాయంగా పవన్ ను చిరంజీవి ఆలింగనం చేసుకోగా నాగబాబు భావోద్వేగానికి గురయ్యారు. ఆ సమయంలో మెగా కుటుంబ సభ్యులంతా ఒకింత ఎమోషనల్ అయ్యారు. ‘డియర్ కల్యాణ్ బాబు’ అంటూ కేక్‌ కట్ చేసి ఎన్నికల్లో గెలుపును సెలబ్రేట్ చేసుకున్నారు. ప్రస్తుతం ఇందుకు సంబంధించిన వీడియోలు, ఫొటోలు సోషల్ మీడియాలో వైరల్ గా మారాయి.
