వపర్ స్టార్ పవన్ కళ్యాణ్ అభిమానులకు ఈ రోజు స్వీట్ షాక్ ఇచ్చింది పీపుల్స్ మీడియా ఫ్యాక్టరీ సంస్థ. ఈ బేనర్లో ఈ మధ్యే మొదలైన పవన్ కళ్యాణ్ కొత్త సినిమాకు అప్పుడే రిలీజ్ డేట్ ఇచ్చేశారు. ఈ చిత్రం జులై 28న విడుదల కాబోతున్నట్లు ఈ రోజే అనౌన్స్‌మెంట్ ఇచ్చారు.
ఈ చిత్రం మొదలైందే ఫిబ్రవరి నెలాఖర్లో కాగా.. రిలీజ్ డేట్ జులై చివర్లో అంటే మొదలైన ఆరు నెలల్లో రిలీజ్ అన్నమాట. పవర్ స్టార్ లాంటి పెద్ద హీరో సినిమాను ఇంత త్వరగా ప్రేక్షకుల ముందుకు తేవడం అన్నది అనూహ్యమైన విషయం.
ఐతే ఇది రీమేక్ మూవీ కావడం, భారీ హంగామా ఏమీ లేని చిత్రం కావడం.. స్క్రిప్టు పక్కాగా రెడీ చేసుకుని, షెడ్యూళ్లు కూడా పర్ఫెక్ట్‌గా ప్లాన్ చేసుకుని రంగంలోకి దిగడం వల్ల చాలా తక్కువ రోజుల్లో షూటింగ్ పూర్తి చేయబోతున్నారు.
పవన్ ఈ సినిమా కోసం సరిగ్గా 20 రోజులు డేట్లు ఇవ్వగా.. ఆయన పాత్రకు సంబంధించిన చిత్రీకరణ కూడా పూర్తి కావస్తోంది. ఆ తర్వాత ఆయనతో సంబంధం లేని సన్నివేశాలు తీసి.. చకచకా సినిమాను రిలీజ్‌కు రెడీ చేయబోతున్నారు.
ఇక ఈ సినిమాను జులైలో రిలీజ్ చేయబోతుండటంపై మెగా అభిమానుల్లో హర్షం వ్యక్తమవుతోంది. ఎందుకంటే మెగా ఫ్యామిలీ హీరోలకు ఈ నెల చాలా స్పెషల్. పవన్ కళ్యాణ్ సంగతే తీసుకుంటే జులై 24న రిలీజైన ‘తొలి ప్రేమ’ పవన్‌కు మరపురాని సినిమా అయింది. ఇదే నెల చివర్లో వచ్చిన ‘ఇంద్ర’ మెగాస్టార్ చిరంజీవికి అప్పట్లో కెరీర్ బిగ్గెస్ట్ బ్లాక్‌బస్టర్‌గా నిలిచింది.
ఇక రామ్ చరణ్‌కైతే జులై నెలాఖర్లో వచ్చిన ‘మగధీర’ మామూలు సక్సెస్ కాదు. ఏకంగా ఇండస్ట్రీ హిట్ అయింది. వరుణ్ తేజ్‌కు సైతం జులైలో ‘ఫిదా’ లాంటి బ్లాక్‌బస్టర్ ఉంది. ఈ నేపథ్యంలో పవన్-తేజు సినిమా కూడా జులై నెలాఖర్లో రాబోతుండటంతో ఇది కూడా సూపర్ హిట్ కావడం ఖాయమనే అంచనాతో ఉన్నారు ఫ్యాన్స్.
