నరసాపురంలో జనసేన ఆధ్వర్యంలో ఏర్పాటు చేసిన మత్స్యకారుల అభ్యున్నతి సభకు జనసేనాని పవన్ కల్యాణ్ హాజరయ్యారు. ఈ సందర్భంగా జగన్ సర్కార్ పై పవన్ విరుచుకుపడ్డారు. జగన్ ప్రభుత్వంపై సెటైర్లతోనే సభను పవన్ మొదలుబెట్టారు. తనకోసం జగన్ సర్కార్ రోడ్లంతా గతుకులు, గొయ్యిలు తీసి పెట్టడంతో పడవ ప్రయాణం చేసినట్టు ఉందని పవన్ సెటైర్లు వేశారు. ఆ ప్రయాణానికి మాయాబజార్ చిత్రంలోని లాహిరి లాహిరిలో పాట గుర్తొచ్చిందని, అందుకే సభలో ఉత్సాహంగా మాట్లాడలేనేమోనని ఎద్దేవా చేశారు.
మీ పిచ్చి పిచ్చి వేషాలకు జనసేన భయపడదంటూ జనసేనను బెదిరించాలనే చూసే నాయకులకు వార్నింగ్ ఇచ్చారు పవన్. సంయమనం పాటించడం తమ బలం అని, బలహీనత కాదని, గొడవలు పెట్టుకోవాలంటే ఒకటికి రెండుసార్తు ఆలోచిస్తామని అన్నారు. కార్యకర్తల కుటుంబాలను కూడా దృష్టిలో ఉంచుకుని కార్యకర్తలను ఇబ్బందుల పాల్జేసే నిర్ణయాలు తీసుకోనని అన్నారు. తమ కార్యకర్తలపై అక్రమ కేసులు బనాయించి, ఇదే విధంగా హింసిస్తే రోడ్డుపై ఏ స్థాయికైనా దిగి పోరాడతానని హెచ్చరించారు.
మత్స్యకారులకు వ్యతిరేకంగా తెచ్చిన జీవో 217కు వ్యతిరేకంగా పోరాడి తీరతామని, వెనుకంజ వేసే ప్రసక్తే లేదని అన్నారు. జనసేనకు 10మంది ఎమ్మెల్యేలుండుంటే ఈ జీవో 217ని ప్రభుత్వం తెచ్చే ధైర్యం చేసి ఉండేది కాదని,.. చించేసేవాళ్లం అని ఆవేశపూరితంగా మాట్లాడారు పవన్. ఆ జీవో ప్రతులను చించివేసిన తనపై కేసులు పెట్టుకోవచ్చని సవాల్ విసిరారు. ప్రజలను ఇబ్బందులకు గురిచేసే చట్టాలను ఉల్లంఘించడానికే ఇష్టపడతానని పవన్ అన్నారు.
అంతకుముందు, బహిరంగ సభకు వస్తుండగా నిర్వహించిన రోడ్ షోలో పవన్ పెను ప్రమాదం నుంచి తృటిలో తప్పించుకున్నారు. పవన్ చాలాకాలం తర్వాత బహిరంగ సభ పెట్టనుండడంతో పవన్ అభిమానులు, జనసేన కార్యకర్తలు భారీగా తరలివచ్చారు. రాజమండ్రి ఎయిర్ పోర్టు నుంచి నరసాపురం చేరుకునేవరకు పవన్ వెంట అభిమానుల కోలాహలం కనిపించింది. ఈ క్రమంలోనే పవన్ రోడ్ షోకు వేలాదిమంది తరలివచ్చారు. ఈ సందర్భంగా పవన్ కల్యాణ్ కు తృటిలో పెను ప్రమాదం తప్పింది.
రోడ్ షో సందర్భంగా తన వాహనంలో పైకి లేచి నిలబడి పవన్ అభిమానులకు చేయి ఊపుతున్నారు. వేలాదిగా వచ్చిన అభిమానులకు అభివాదం చేస్తూ ముందుకు సాగుతున్నారు. ఇంతలో ఓ అభిమాని హఠాత్తుగా పవన్ వాహనంపైకి దూసుకు వచ్చాడు. వేగంగా వచ్చిన అతడు…పవన్ మెడపై చేయి వేసి ఆయనను కౌగిలించుకోబోయాడు. ఒక్కసారి అతడు మీదపడడంతో పవన్ కారుపైనే చతికిలబడ్డారు. ఆ తర్వాత పవన్ పైకి లేచి యథావిధిగా రోడ్ షో కొనసాగించారు. మరోవైపు, రోడ్ షో సందర్భంగా ఓ యువతి కారు బాయ్ నెట్ పైకి ఎక్కి మరీ పవన్ కు హారతివ్వడం హాట్ టాపిక్ గా మారింది.
