టోల్ గేట్ల దగ్గర వైసీపీ నేతలు వీరంగం సృష్టించిన ఘటనలు అనేకం ఉన్నాయి. నిబందనల ప్రకారం టోల్ కట్టాలని అడిగిన సిబ్బందిపై భౌతిక దాడులకు పాల్పడిన వైనం గతంలో తీవ్ర చర్చనీయాంశమైంది. గతంలో వడ్డెర కార్పొరేషన్ చైర్మన్ దేవండ్ల రేవతి విజయవాడ సమీపంలోని కాజా టోల్ ప్లాజా దగ్గర నానా రచ్చ చేసిన ఘటన వైరల్ అయింది. అయినా సరే వైసీపీ నేతల తీరు మారడం లేదనడానికి తాజా ఘటనే నిదర్శనం.
పత్తికొండ ఎమ్మెల్యే శ్రీదేవి నిన్న మధ్యాహ్నం కారులో కర్నూలు నుంచి డోన్ వెళుతుండగా…ఆమె వెంట కాన్వాయ్ కూడా ఉంది. అయితే, ఈ క్రమంలో అమకతాడు టోల్‌గేటు వద్ద ఎమ్మెల్యే కారును పంపిన సిబ్బంది…ఆమె అనుచరుల వాహనాలను అడ్డుకున్నారు. దీంతో, శ్రీదేవి అనుచరులు ఉచితంగా తమ వాహనాలను పంపనందుకు టోల్‌గేటు సిబ్బందిపై కర్రలతో విచక్షణారహితంగా దాడికి పాల్పడ్డారు.
కారులో నుంచి దిగిన ఐదుగురు వ్యక్తులు తమ కారును ఎందుకు పంపలేదంటూ టోల్ ప్లాజా సిబ్బందిపై దుర్భాషలాడారు. సిబ్బందిని శ్రీదేవి అనుచరుడు ఒకరు కర్రతో వెంబడించారు. ఇందుకు సంబంధించిన వీడియో సోషల్ మీడియాలో వైరల్ అయింది. ఎమ్మెల్యే శ్రీదేవి అనుచరుల దాడి ఘటనలో ఓ వ్యక్తి గాయపడ్డాడు. అయితే, ఆ దాడికి సంబంధించి ఎటువంటి ఫిర్యాదు నమోదు కాలేదు. ఎమ్మెల్యే శ్రీదేవి అనుచరులు గతంలోనూ పలు వివాదాల్లో చిక్కుకున్న వైనం చర్చనీయాంశమైంది.
