టీడీపీ అధినేత నారా చంద్రబాబు నాయుడును స్కిల్ డెవలప్మెంట్ కేసులో అరెస్ట్ చేసిన సంగతి తెలిసిందే. రాజమండ్రి సెంట్రల్ జైల్లో దాదాపు 50 రోజుల జ్యుడీషియల్ రిమాండ్ తర్వాత చంద్రబాబు బెయిల్ పై విడుదలయ్యారు. అయితే, మాజీ ముఖ్యమంత్రి హోదాలో ఉన్న తనను అరెస్టు చేసే క్రమంలో సిఐడి అధికారులు సెక్షన్ 17 ఏ ను పాటించలేదని చంద్రబాబు ఏపీ హైకోర్టును ఆశ్రయించారు. తనపై దాఖలు చేసిన ఎఫ్ఐఆర్ ను క్వాష్ చేయాలని కోరుతూ గత ఏడాది సెప్టెంబర్ 22వ తేదీన హైకోర్టులో క్వాష్ పిటిషన్ దాఖలు చేశారు.
అయితే, ఆ క్వాష్ పిటిషన్ ను ఏపీ హైకోర్టు కొట్టివేసింది. దీంతో, హైకోర్టు తీర్పును సవాల్ చేస్తూ చంద్రబాబు సుప్రీంకోర్టును ఆశ్రయించారు. సెక్షన్ 17ఏ చంద్రబాబుకు వర్తిస్తుందా లేదా అన్న విషయంపై ఏపీ సీఐడీ, చంద్రబాబు తరఫు న్యాయవాదులు వాదనలు విన్న సుప్రీంకోర్టు ధర్మాసనం గతంలో తీర్పు రిజర్వ్ చేసింది.
ఈ క్రమంలోనే ఈ రోజు సుప్రీంకోర్టు డివిజనల్ బెంచ్ చంద్రబాబు దాఖలు చేసిన స్పెషల్ లీవ్ పిటిషన్ పై తీర్పునిచ్చింది. ఈ పిటిషన్ పై విచారణను సుప్రీంకోర్టు త్రిసభ్య ధర్మాసనానికి డివిజనల్ బెంచ్ బదిలీ చేసింది. సుప్రీంకోర్టు ప్రధాన న్యాయమూర్తి జస్టిస్ డివై చంద్ర చూడ్ నేతృత్వంలోని త్రిసభ్య ధర్మాసనం ఈ పిటిషన్ కు సంబంధించిన విచారణ జరపనుంది. ఈ రోజు తీర్పును జడ్జిలు అనిరుద్ బోస్, జస్టిస్ బేలా త్రివేది వెలువరించారు. అయితే, ఈ ఇద్దరు జడ్జిలు భిన్నాభిప్రాయాలు వ్యక్తం చేయడంతో ఈ పిటిషన్ పై విచారణ త్రిసభ్య ధర్మాసనానికి చేరింది. దీంతో, సుప్రీంకోర్టు సిజెఐ నేతృత్వంలోని త్రిసభ్య ధర్మాసనం సెక్షన్ 17 పై ఎటువంటి తీర్పు వెలువరించనుంది అన్న ఆసక్తి ఏర్పడింది.
