నివేదా థామస్.. ఈ మలయాళ ముద్దుగుమ్మ గురించి కొత్తగా పరిచయం అవసరం లేదు. చైల్డ్ ఆర్టిస్ట్ గా కెరీర్ ప్రారంభించి ఆ తర్వాత హీరోయిన్ గా మారిన నివేదా థామస్.. జెంటిల్ మెన్ మూవీ ద్వారా తెలుగు సినీ పరిశ్రమకు ప‌రిచ‌య‌మైంది. తొలి సినిమాతోనే విపరీతమైన క్రేజ్ సంపాదించుకుంది. ఆ తర్వాత నిన్ను కోరి, జై లవకుశ, జూలియట్ లవర్ ఆఫ్ ఇడియట్, 118, బ్రోచేవారెవరురా తదితర చిత్రాలు చేసింది. అటు తమిళంలోనూ పలు చిత్రాల్లో నటించింది.
త‌క్కు స‌మ‌యంలోనే తనదైన అందం అభినయంతో ఎక్కువ మంది ఫాన్స్ ను సంపాదించుకుంది. అయితే లాక్ డౌన్ తర్వాత కొత్త హీరోయిన్ల పోటీ ఎక్కువగా ఉండడం వల్ల నివేదా థామస్ కు అవ‌కాశాలు కరువయ్యాయి. దీంతో ఈ అమ్మడు వెండితెరపై కనిపించి దాదాపు రెండేళ్లు అవుతోంది. 2022లో వచ్చిన షాకిని డాకిని తర్వాత నివేదా నుంచి మరో చిత్రం రాలేదు. దీంతో ఆమె కెరీర్ క్లోజ్ అనే ప్రచారం జరిగింది. ఈ క్ర‌మంలోనే పలు మార్లు ఆమె పెళ్లి వార్త‌లు కూడా తెర‌పైకి వ‌చ్చాయి.
దీనికి తోడు రీసెంట్ గా నివేదా థామస్ తన తన ఇన్‌స్టా స్టోరీలో `ఎన్నో రోజుల తర్వాత.. ఫైనల్లీ` అని ఓ పోస్ట్ పెట్టింది. దీనికి లవ్‌ సింబల్‌ను జోడించ‌డంతో.. నివేదా పెళ్లి ఫిక్స్ అయింద‌ని రెండు రోజుల నుంచి పెద్ద ఎత్తున్న ప్రచారం జ‌రుగుతోంది. అయితే ఆ ప్రచారానికి చెక్ పెడుతూ తాజాగా నివేదా సడెన్ సర్ప్రైజ్ ఇచ్చింది. చాలా గ్యాప్ అనంత‌రం తన రాబోయే చిత్రాన్ని ప్రకటించింది. `35 – చిన్న క‌థ కాదు` అనే ఇంట్రెస్టింగ్ టైటిల్ తో నివేదా థామస్ ఓ సినిమా చేసింది. నందకిశోర్‌ అనే కొత్త దర్శకుడు ఈ సినిమా ద్వారా ఇండ‌స్ట్రీకి పరిచయం అవుతున్నారు.
అలాగే నటుడు రానా దగ్గుబాటి ఈ చిత్రానికి సమర్పకుడిగా వ్యవహరిస్తుండ‌గా.. సృజన ఎర్రబోలు, సిద్ధార్థ్‌ రాళ్లపల్లి నిర్మాత‌లుగా ఉన్నారు. తిరుప‌తి బ్యాక్‌డ్రాప్ లో సాగే 35 మూవీలో క‌మెడియ‌న్ క‌మ్ హీరో ప్రియ‌ద‌ర్శి పులికొండ, నివేదా థామ‌న్ జంట‌గా న‌టించారు. సీనియర్‌ నటి గౌతమి కీలక పాత్రలో క‌నిపించ‌బోతున్నారు. ఆల్మోస్ట్ షూటింగ్ కంప్లీట్ చేసుకున్న 35 సినిమా ఆగస్టు 15న ప్రేక్షకుల ముందుకు రానున్నట్లు చిత్ర యూనిట్ వెల్లడించింది. మొత్తానికి చాలా కాలం తర్వాత నివేదా ఒక సినిమాను అనౌన్స్ చేయ‌డంతో ఆమె ఫ్యాన్స్ ఫుల్ ఖుషీ అవుతున్నారు.
