మంచు ఫ్యామిలీ ఎప్పట్నుంచో ప్రతిష్టాత్మకంగా భావిస్తున్న సినిమా భక్త కన్నప్ప . మంచు విష్ణుకు ఇది డ్రీమ్ ప్రాజెక్ట్ అని చెప్పొచ్చు. ఎన్నో ఏళ్ల నుంచి చర్చల్లో ఉన్న ఈ సినిమా.. ఎట్టకేలకు కొన్ని నెలల కిందట మొదలైంది. దాదాపు వంద కోట్ల బడ్జెట్లో ఈ సినిమా తీయడానికి మోహన్ బాబు సిద్ధమయ్యారు. మహాభారతం సీరియల్ ఫేమ్ ముకేష్ కుమార్ సింగ్ ఈ చిత్రాన్ని డైరెక్ట్ చేయబోతున్నాడు.
ఇటీవలే ఈ సినిమాకు సంబంధించి ఒక హాట్ అప్‌డేట్ బయటికి వచ్చింది. ఇందులో యంగ్ రెబల్ స్టార్ ప్రభాస్ ఓ కీలక పాత్ర చేయబోతున్నట్లు మంచు విష్ణునే స్వయంగా వెల్లడించాడు. ప్రభాస్ ఇందులో శివుడి పాత్రలో నటిస్తాడని అంటున్నారు. ప్రభాస్ ఈ సినిమాలో నటిస్తున్నాడంటే.. దీని రేంజే మారిపోతుందనడంలో సందేహం లేదు. కాగా ఇప్పుడు కాస్టింగ్‌కు సంబంధించి ఇంకో ఎగ్జైటింగ్ విషయం బయటికి వచ్చింది.
ప్రభాస్ చేసే శివుడి పాత్రకు జోడీగా పార్వతి క్యారెక్టర్లో లేడీ సూపర్ స్టార్ నయనతార నటించనుందట. ఇది ఊహాగానం ఏమీ కాదు. ‘కన్నప్ప’లో ఓ కీలక పాత్ర చేస్తున్న సీనియర్ నటి మధుబాల ఈ విషయాన్ని ధ్రువీకరించింది. ఓ ఇంటర్వ్యూలో ఆమె మాట్లాడుతూ.. తాను కన్నప్పలో నటిస్తున్న విషయం వెల్లడించింది. అంతే కాక ఇందులో ప్రభాస్‌తో పాటు నయనతార విషయాన్ని బయటపెట్టింది. ప్రభాస్, నయనతార గతంలో ‘యోగి’ సినిమా చేశారు. ఇప్పుడీ ఇద్దరూ శివుడు, పార్వతిల పాత్రల్లో కనిపించనున్నారు.
ప్రభాస్, నయన్ క్యామియోలు చేసినా సరే.. సినిమాకు పాన్ ఇండియా అప్పీల్ వస్తుందనడంలో సందేహం లేదు. ఐతే ఈ చిత్రంలో కథానాయికగా అనుకున్న కృతి సనన్ చెల్లెలు నుపుర్ సనన్ మాత్రం ఇటీవలే ఈ ప్రాజెక్టు నుంచి బయటికి వెళ్లిపోయింది. డేట్లు సర్దుబాటు కాకపోవడం వల్లే ఆమె తప్పుకున్నట్లు విష్ణు ప్రకటించిన సంగతి తెలిసిందే. ఆమె స్థానంలోకి ఎవరొస్తారో చూడాలి.
