సినీ హీరోగా తెలుగు ప్రజలకు సుపరిచితులు.. తర్వాతి కాలంలో తన ఇమేజ్ ను తానే తగ్గించుకున్న నటుడిగా నవదీప్ కున్న పేరు అంతా ఇంతా కాదు. టాలీవుడ్ కు సంబంధించి ఏదైనా సంచలన వివాదం అన్నంతనే ఆయన పేరు వినిపిస్తూ ఉంటుంది. పబ్బుల్లో గొడవలు మొదలు కొని డ్రగ్స్ కు సంబంధించిన ఆరోపణల్లో ఆయన పేరు తరచూ వినిపించటం తెలిసిందే. తరచూ ఏదో ఒక వివాదంలో ఆయన పేరు రావటం ఒక ఎత్తు అయితే.. తాజాగా డ్రగ్స్ కేసుకు సంబంధించిన అంశాలు ఆయన్ను ఇబ్బందికి గురి చేస్తున్నాయి.
గతానికి భిన్నంగా ఈసారి మాత్రం నవదీప్ తీరు కాస్త భిన్నంగా ఉందంటున్నారు. తాను ఎలాంటి తప్పు చేయలేదని కాన్ఫిడెంట్ గా చెబుతున్న ఆయన.. మాదాపూర్ లో జరిగిన రేవ్ పార్టీలో సినీ నిర్మాత వెంకట రత్నారెడ్డి అరెస్టు వేళ.. నవదీప్ కు లింకులు ఉన్నాయన్న ఆరోపణను తీవ్రంగా ఖండిస్తున్నారు. డ్రగ్స్ వినియోగదారుడిగా నవదీప్ ను పోలీసులు గుర్తించటం తెలిసిందే.
హైదరాబాద్ మహానగరంలో బీపీఎం పబ్ ను నిర్వహించిన వేళలో ముంబయి నుంచి మాదకద్రవ్యాలను కొనుగోలు చేసినట్లుగా సాక్ష్యాలు వెలుగు చూడటం.. వీటి ఆధారంగా తీగ లాగితే ముంబయి.. బెంగళూరు.. ఢిల్లీకి చెందిన నైజీరియన్లు.. స్థానిక డ్రగ్స్ అమ్మకందార్లతో ఉన్న సంబంధాలు వెలుగు చూడటం తెలిసిందే.
అయితే.. తనకున్న పాత లింకులపై కీలక వ్యాఖ్యలు చేసిన ఆయన.. ఇప్పుడు మాత్రం తనకు ఎలాంటి సంబంధాలు లేవని స్పష్టం చేస్తున్నారు. అదే సమయంలో తనకు గతంలోని సంబంధాల విషయంలోనూ తాను బాధితుడన్న అభిప్రాయం కలిగిలే ఆయన వాదన ఉండటం గమనార్హం. డ్రగ్స్ ఇష్యూలోనే కాదు.. గతంలోని పలు వివాదాలకు సంబంధించిన కేసులు ఆయనపై ఉన్నట్లుగా పోలీసులు చెబుతున్నారు.
దాదాపు పన్నెండేళ్ల క్రితం సాగర్ కు విహారానికి వెళ్లిన వేళలో.. అనుమతి లేకుండానే క్రిష్ణానదిలో ప్రయాణం చేసిన వైనాన్ని పోలీసులు గుర్తు చేస్తున్నారు. తన స్నేహితులతో వెళ్లిన నవదీప్ రూల్స్ ను అతిక్రమించిన వైనాన్ని పేర్కొంటున్నారు. ఆ ఏడాదిలోనే హైదరాబాద్ లోని ఒక ప్రముఖ హోటల్ లో కొందరు ఇంజినీరింగ్ విద్యార్థులతో గొడవ పడటం.. అందులో భాగంగా ఒక స్టూడెంట్ ను నవదీప్ గాయపర్చినట్లుగా ఆరోపణలు ఉన్నాయి.
దీనికి సంబంధించి ఇరు వర్గాల వారు కేసులు పెట్టుకోవటం.. అవి మాదాపూర్ పోలీస్ స్టేషన్ లో పెండింగ్ లో ఉండటాన్ని ప్రస్తావిస్తున్నారు. మితిమీరిన వేగంతో కారును నడిపిన కేసు పెండింగ్ లో ఉంది. రెండోసారి డ్రగ్స్ కేసులోనూ ఆయనపై ఆరోపణలు ఉన్నాయి. ఇలా ప్రతి సందర్భంలోనూ ఆయన వివాదాలకు కేంద్రంగా నిలుస్తూ.. కేసులతో సహవాసం చేస్తున్న వైనం టాలీవుడ్ లోనూ.. పోలీసు వర్గాల్లోనూ హాట్ టాపిక్ గా మారింది.
