టాలీవుడ్ సీనియర్ నటుడు నరేష్, నటి పవిత్ర లోకేష్ ల పెళ్లి వ్యవహారం వార్తల్లో ప్రముఖంగా వినిపించిన సంగతి తెలిసిందే. పెళ్ళికి ముందు కొద్దిరోజులు వీరిద్దరూ రిలేషన్ షిప్ లో ఉన్న సమయంలో రకరకాల పుకార్లు చక్కర్లు కొట్టాయి. ఇక, సోషల్ మీడియాలో అయితే ఈ జంటపై విపరీతమైన ట్రోలింగ్ జరిగింది. సోషల్ మీడియాలో తమపై జరుగుతున్న ట్రోలింగ్ నేపథ్యంలో అల్లరి నరేష్ రెండుసార్లు పోలీస్ స్టేషన్ కి వెళ్లి కంప్లైంట్ కూడా చేయాల్సి వచ్చింది.
కట్ చేస్తే ఒక ఫైన్ డే ఈ జంట తాము పెళ్లి చేసుకోబోతున్నాం అంటూ లిప్ లాక్ ఇచ్చి మరి ప్రపంచానికి అనౌన్స్ చేసింది. ఈ నేపథ్యంలోనే నరేష్, పవిత్ర లోకేష్ లు జంటగా “మళ్లీ పెళ్లి” అనే చిత్రం తెరకెక్కిన సంగతి తెలిసిందే. నరేష్ జీవితంలోని వాస్తవ ఘటనల ఆధారంగా ఈ చిత్రాన్ని దర్శకుడు ఎమ్మెస్ రాజు తెరకెక్కిస్తున్నారు.
ఈ క్రమంలోనే తాజాగా ఆ చిత్రం ట్రైలర్ విడుదలైంది. నరేష్ తన సొంత బ్యానర్ విజయ కృష్ణ మూవీస్ పై నిర్మిస్తున్న ఈ చిత్ర ట్రైలర్ బోల్డ్ గా ఉంది. నరేష్, పవిత్రల పరిచయం దగ్గర నుంచి అది కాస్త ప్రేమగా మారడం, ఆ తర్వాత మా ఎలక్షన్స్ ఎపిసోడ్, బెంగళూరు హోటల్లో నరేష్ మూడో భార్య ఎంట్రీ ఎపిసోడ్ వంటివన్నీ ఈ ట్రైలర్ లో చూపించే ప్రయత్నం చేశారు.
కొన్ని డబుల్ మీనింగ్ డైలాగులతో బోల్డ్ కంటెంట్ ఉందనే విషయాన్ని చెప్పారు ఎమ్మెస్ రాజు. ఇక, నరేష్ 1000 కోట్ల ఆస్తిపై ఆయన మూడో భార్య కన్నేసినట్లుగా చూపించే ప్రయత్నం చేశారు. ముసలోడు అని కనికరించి పెళ్లి చేసుకుంటే అంటూ నరేష్ మూడో భార్య పాత్ర పోషించిన వనిత విజయ్ చెప్పే డైలాగ్ ఈ ట్రైలర్ కి హైలైట్. మే 26న ఈ చిత్రం విడుదల కాబోతోంది.
