టాలీవుడ్ హీరో నారా రోహిత్ త్వ‌ర‌లోనే పెళ్లిపీట‌లెక్క‌బోతున్నాడు. ఇటీవ‌ల విడుద‌లైన `ప్రతినిధి 2` సినిమాలో హీరోయిన్ గా అల‌రించిన సిరి(శిరీష) లెల్లాతో నారా రోహిత్ ఏడ‌డుగులు వేసేందుకు రెడీ అవుతున్నాడు. ఆదివారం ఉద‌యం రోహిత్-సిరిల ఎంగేజ్మెంట్ వేడుక ఘ‌నంగా జ‌రిగింది. హైదరాబాద్‌లోని నోవాటెల్‌ హోటల్ ఇందుకు వేదిక అయింది. ఇరుకుటుంబ స‌భ్యులు, బంధువులు స‌మ‌క్షంలో ఉద‌యం 10:45 గంట‌ల‌కు నారా రోహిత్, సిరి ఉంగ‌రాలు మార్చుకున్నారు.
ఈ శుభ కార్యక్రమానికి ఏపీ సీఎం చంద్రబాబు నాయుడు, ఆయ‌న స‌తీమ‌ణి భువ‌నేశ్వ‌రి, కుమారుడు నారా లోకేష్, కోడలు బ్రాహ్మణి మ‌రియు నారావారి ఫ్యామిలీ మెంబ‌ర్స్ అంతా హాజ‌రు అయ్యారు. అలాగే నందమూరి కుటుంబసభ్యులు కూడా నారా రోహిత్ ఎంగేజ్మెంట్ వేడుక‌లో సంద‌డి చేశారు. కాబోయే వ‌ధూవ‌రుల‌ను ఆశీర్వ‌దించారు. ప్ర‌స్తుతం కొత్త జంట ఫోటోలు సోష‌ల్ మీడియాలో చ‌క్క‌ర్లు కొడుతున్నాయి.
ఇక‌పోతే చంద్రబాబు త‌మ్ముడు రామ్మూర్తి నాయుడు కుమారుడే నారా రోహిత్. భారీ ఫ్యామిలీ బ్యాక్‌గ్రౌండ్ ఉన్నా కూడా తన కష్టాన్నే నారా రోహిత్ నమ్ముకున్నాడు. సినిమా రంగంలోకి వ‌చ్చి హీరోగా ఎదిగాడు. సెల‌క్టివ్ గా క‌థ‌ల‌ను ఎంపిక చేసుకుంటూ వైవిధ్యమైన చిత్రాలకు కేరాఫ్ గా నిలిచాడు.
భారీ స్టార్డ‌మ్ ద‌క్క‌క‌పోయినా ఇండ‌స్ట్రీలో త‌న‌కంటూ ఓ స్పెష‌ల్ ఇమేజ్ ను క్రియేట్ చేసుకున్న నారా రోహిత్.. నాలుగు ప‌దులు వ‌య‌సులో ప్రతినిధి 2 హీరోయిన్ అయిన సిరితో ప్రేమ‌లో ప‌డ్డాడు. పెద్ద‌ల అంగీకారంతో నేడు నిశ్చితార్థం చేసుకున్న ఈ జంట.. డిసెంబ‌ర్ 15న మూడు ముళ్లబంధంతో ఒక‌టి కానున్నార‌ని తెలుస్తోంది.
