విజయవాడలో వరద విలయ తాండవం చేసిన సంగతి తెలిసిందే. భారీ వర్షాల వల్ల వచ్చిన వరదకు తోడు బుడమేరు పొంగడంతో బెజవాడ బెంబేలెత్తింది. విజయవాడ నగరానికి, అక్కడి ప్రజలకు భారీ నష్టం వాటిల్లింది. ఈ క్రమంలోనే వరద బాధితులను ఆదుకోవడంతోపాటు సహాయక చర్యల కోసం పలువురు సినీ, వ్యాపార ప్రముఖులు సీఎం ఫ్లడ్ రిలీఫ్ ఫండ్ కు భారీ మొత్తం విరాళాలిచ్చి తమ ఉదారతను చాటుకున్నారు. ఈ క్రమంలోనే స్వర్గీయ నందమూరి తారక రామారావు తనయుడు నందమూరి మోహనకృష్ణ, మోహన కృష్ణ కుమార్తె నందమూరి మోహన రూప సీఎంఆర్ఎఫ్ఎఫ్ కు తమ వంతు సాయం ప్రకటించారు.
వరద బాధితుల కోసం రూ.25 లక్షలు విరాళంగా ప్రకటించి ఆ చెక్ ను సీఎం చంద్రబాబకు వారు స్వయంగా అందించారు. 2024 సార్వత్రిక ఎన్నికల్లో టీడీపీ తరఫున నందమూరి మోహన రూప ఆంధ్రప్రదేశ్, తెలంగాణలలో ముమ్మరంగా ప్రచారం చేశారు. నందమూరి మోహనకృష్ణ కెమెరామన్ గా టాలీవుడ్ కు సుపరిచితులే. బ్రహ్మంగారి చరిత్ర, అనురాగ దేవత, చండశాసనుడు, నందమూరి బాలకృష్ణ గారు నటించిన పలు సినిమాలకు, విక్టరీ వెంకటేష్ గారు నటించిన శ్రీనివాస కళ్యాణంతోపాటు పలు తమిళ, హిందీ చిత్రాలకు డైరెక్టర్ ఆఫ్ ఫోటోగ్రఫీగా, పలు సినిమాలకు నిర్మాతగా, డిస్ట్రిబ్యూటర్, ఎగ్జిబిటర్ గా వ్యవహరించారు.
దివంగత నటుడు తారకరత్న… నందమూరి మోహనకృష్ణ కుమారుడే.
