మెగా స్టార్ చిరంజీవి హీరోగా మోహన్ రాజా దర్శకత్వంలో తెరకెక్కిన ‘గాడ్ ఫాదర్’ సినిమా దసరా కానుకగా అక్టోబర్ 5న విడుదల కాబోతోన్న సంగతి తెలిసిందే. విడుదల తేదీ దగ్గర పడుతుండడంతో ఈ సినిమా ప్రమోషన్స్ స్పీడ్ పెంచింది చిత్ర యూనిట్. ఇప్పటికే విడుదలై తార్ మార్ తక్కర్ మార్ పాట..ట్రెండ్ అవుతోంది. ఈ క్రమంలోనే తాజాగా గాడ్ ఫాదర్ క్యారెక్టర్ రివీల్ చేసేలా మరో లిరికల్ సాంగ్ ను రిలీజ్ చేశారు.
‘నజ భజ జజర .. నజ భజ జజర .. గజ గజ వణికించే గజరాజాదిగోరా’ అంటూ సాగే ఈ పాట యూట్యూబ్ లో దుమ్మురేపుతోంది. చిరంజీవి యాక్షన్ సీన్స్ .. మేకింగ్ వీడియోలు కలగలిపి ఈ పాటను రూపొందించారు. అనంత శ్రీరామ్ సాహిత్యాన్ని అందించిన ఈ పాటను శ్రీకృష్ణ – పృథ్వీ చంద్ర పాడారు. తన అనుచరులకు ‘గాడ్ ఫాదర్’ అయిన హీరో ఎంత పవర్ఫుల్ అనే విషయాన్ని చెబుతూ ఈ పాట సాగింది. ఈ పాటకు థమన్ ఇచ్చిన బ్యాక్ గ్రౌండ్ మ్యూజిక్ మెగా ఫ్యాన్స్ కు గూస్ బంప్స్ తెప్పిస్తుందనడంలో సందేహం లేదు.
“ఘీమ్ ఘీమ్ ఘీంకరించిన ఐరావతం… గిర్రుగిర్రున తొండము తిప్పితె చిత్తడై పోతావ్…అడవి తల్లికి అన్నయ్య వీడురా… కలబడితే కథకళిరా…”అంటూ సిట్యువేషనల్ సాంగ్ లా కనిపిస్తోందీ పాట. ఈ లిరికల్ సాంగ్ రిలీజైన కొద్ది సేపటికే సోషల్ మీడియాలో, యూట్యూబ్ లో ట్రెండింగ్ లో ఉంది. మెగాస్టార్ అభిమానులను ఈ పాట ఉర్రూతలూగిస్తోంది. ఎన్వీ ప్రసాద్ – ఆర్.బి.చౌదరి నిర్మించిన ఈ సినిమాకి చరణ్ కూడా నిర్మాణ భాగస్వామిగా ఉన్నాడు.
మలయాళ సూపర్ హిట్ సినిమా ‘లూసిఫర్’ రీమేక్ గా వస్తున్న ఈ సినిమా ఆచార్యతో నిరుత్సాహ పడ్డ తమను తప్పక అలరిస్తుందని మెగా ఫ్యాన్స్ భారీ అంచనాలతో ఉన్నారు. ఇటీవలే తన ఇంట్లో ఈ సినిమా ప్రివ్యూను చిరు చూసి చాలా సంతోషించారట. ఔట్ పుట్ బాగా వచ్చిందని దర్శకుడు మోహన్ రాజాను చిరు అభినందించారట.
