అక్కినేని మన్మధుడు, టాలీవుడ్ కింగ్ నాగార్జున సరైన హిట్ అందుకుని చాలా కాలమే అయింది. 2016లో విడుదలైన బ్లాక్ బస్టర్ `సోగ్గాడే చిన్ని నాయనా` తర్వాత నాగార్జున హిట్ ముఖం చూడలేదు.
సోగ్గాడే చిన్ని నాయనా కు సీక్వెల్ గా ఇటీవల `బంగార్రాజు` సినిమా విడుదలైంది. అయితే ఈ సినిమాలో నాగార్జున కంటే ఆయ‌న తనయుడు నాగచైతన్య పాత్ర‌కే అధిక ప్రాధాన్యత ఇచ్చారు.
దీంతో `బంగార్రాజు` మంచి విజయం సాధించినప్పటికీ.. అది నాగచైతన్య ఖాతాలో పడింది. ఇక రీసెంట్ గా నాగార్జున `ది ఘోస్ట్` మూవీ తో ప్రేక్షకులను పలకరించాడు. ప్రవీణ్ సత్తారు దర్శకత్వం వహించిన ఈ చిత్రంలో సోనాల్ చౌహాన్ హీరోయిన్ గా నటించింది. సునీల్ నారంగ్, శరత్ మరార్, రాం మోహన్ రావు సంయుక్తంగా ఈ చిత్రాన్ని నిర్మించారు.
అవుట్ అండ్ అవుట్ యాక్షన్ ఎంటర్టైనర్ గా రూపుదిద్దుకున్న ఈ చిత్రం దసరా పండుగ కానుకగా అక్టోబర్ 5 న ప్రేక్షకుల ముందుకు వచ్చింది. కానీ ఆశించిన స్థాయిలో విజయం సాధించలేదు. ఈ మూవీ వల్ల బయ్య‌ర్లకు భారీగా నష్టాలు వాటిల్లాయి. అయితే బిగ్ స్క్రీన్ పై ఈ సినిమా ప్రేక్షకులను ఆకట్టుకోలేకపోయినా.. ఓటీటీలో మాత్రం బాగానే అలరిస్తోంది.
ఈ సంగతి పక్కన పెడితే నాగార్జున నెక్స్ట్ ఏ దర్శకుడితో ఉండబోతోంది అన్నది ఇప్పుడు ఆసక్తికరంగా మారింది. నాగ్ కెరీర్ లో తెరకెక్కబోయే 99వ ప్రాజెక్ట్ ఇది. అయితే `ది ఘోస్ట్` విడుదలై ఇన్ని రోజులు గ‌డుస్తున్న నాగార్జున ఇప్పటి వరకు తన తదుపరి చిత్రం ఎవ‌రి దర్శకత్వంలో ఉండబోతోంద‌న్నది మాత్రం క్లారిటీ ఇవ్వలేదు.
దీంతో నెటిజ‌న్లు ఏంటి నాగ్.. నెక్స్ట్ ఉందా, లేదా..? అంటూ కామెంట్లు చేస్తున్నారు. మరోవైపు అభిమానులు నాగార్జున వందో సినిమా కోసం ఎంతో ఆత్రుతగా ఎదురు చూస్తున్నారు. కానీ వందో సినిమా తేలాలంటే ముందు 99వ సినిమా ఎవరితో అన్నది తేలాలి కదా. మరి నాగార్జున తన తదుపరి చిత్రం కోసం ఏ దర్శకుడికి ఓటేస్తాడో చూడాలి.
