టాలీవుడ్ ప్రిన్స్ మహేశ్ బాబు, కీర్తీ సురేశ్ లు జంటగా నటించిన ‘సర్కారువారి పాట’ చిత్రం హిట్ టాక్ తో దూసుకుపోతోన్న సంగతి తెలిసిందే. పరశురామ్ దర్శకత్వంలో తెరకెక్కిన ఈ చిత్రం…ఇప్పటికే దాదాపు రూ. 200 కోట్లకు పైగా వసూళ్లను రాబట్టి బాక్సాఫీస్ హిట్ గా నిలిచింది. మొదట మిక్స్ డ్ టాక్ వచ్చినా…ఆ తర్వాత హిట్ టాక్ తో సినిమా కలెక్షన్లు రాబట్టింది. ఈ సినిమాలో ‘కళావతి’ .. ‘మ మ మహేశా’ పాటలు దుమ్మురేపడంతో మహేశ్ అభిమానులు పండగ చేసుకున్నారు.
ఈ క్రమంలోనే ఫ్యాన్స్ లో మరింత జోష్ నింపేందుకు తాజాగా ఈ చిత్రానికి మరో పాటను యాడ్ చేశారు. ‘మురారివా’ అనే పాటను సినిమాలో యాడ్ చేసి ప్రదర్శిస్తున్నారు. ఈ పాటను ముందే అనుకున్నామనీ, చిత్రీకరణను కూడా పూర్తి చేశామని ప్రమోషన్స్ లోనే డైరెక్టర్ పరశురామ్ చెప్పాడు. అయితే, కొన్ని కారణాల వల్ల ఆ పాట స్థానంలో ‘మ మ మహేశా’ పాటను సెట్ చేశామని అన్నాడు. దీంతో, ‘మురారివా’ పాటను యూ ట్యూబ్ లో రిలీజ్ చేస్తారని అనుకున్నారు.
కానీ, అనూహ్యంగా సినిమాలోనే ఈ పాటను జోడించి ప్రదర్శిస్తున్నారు. దీంతో, ఆ పాట ఈ సినిమాకు అదనపు ఆకర్షణను తీసుకుని వచ్చిందని మహేశ్ ఫ్యాన్స్ అంటున్నారు. మరోవైపు, ఈ చిత్రం తాజాగా దిగ్గజ ఓటీటీ సంస్థ అమెజాన్ ప్రైమ్ లో విడుదలైంది. రెంటల్ విధానంలో రూ. 199 చెల్లించి ఈ సినిమాను అమెజాన్ సబ్ స్క్రైబర్స్ సహా చూడాలనుకున్న వారంతా రెంటల్ రూ.199 చెల్లించాల్సింది. అమెజాన్ ప్రైమ్ చందాదారులకు ఉచితంగా ఈ చిత్రం అందుబాటులోకి రావడానికి మరి కొద్ది రోజులు పట్టొచ్చు.
