ఈ రోజు విజయదశమి సందర్భంగా జరిగిన టీడీపీ-జనసేన సమన్వయ కమిటీ సమావేశం అనంతరం టీడీపీ జాతీయ ప్రధాన కార్యదర్శి నారా లోకేష్ కీలక వ్యాఖలు చేశారు. జనసేన అధినేత పవన్ కల్యాణ్ తో సమావేశమయ్యామని, దసరా నాడు రెండు పార్టీల నేతలు సమావేశం కావడం రాష్ట్రానికి మేలు చేస్తుందని అన్నారు. ఈ భేటీ సందర్భంగా ముఖ్యంగా 3 తీర్మానాలు చేశామని తెలిపారు. చంద్రబాబు అక్రమ అరెస్ట్ కు నిరసనగా, వైసీపీ అరాచక పాలన నుండి ప్రజలను రక్షించాలని, రాష్ట్రాభివృద్ది కోసం టీడీపీ-జనసేన కలిసి పోరాటం చేయాలని తీర్మానించామని లోకేష్ అన్నారు.
నవంబర్ 1వ తేదీన టీడీపీ-జనసేన ఉమ్మడి కార్యాచరణ ప్రకటిస్తామని లోకేష్ వెల్లడించారు. ఏ తప్పు చేయని చంద్రబాబును జైల్లో ఉంచారని, వ్యవస్థలను మేనేజ్ చేసి ప్రతిపక్ష నేతల గొంతు నొక్కుతున్నారని ఆరోపించారు. ఈ నాలుగేళ్లలో ఏపీకి ఒక్క పరిశ్రమ రాలేదని, పక్క రాష్ట్రాలకు యువత వలస వెళుతున్నారని ఆవేదన వ్యక్తం చేశారు. వారాహి యాత్ర, భవిష్యత్తుకు గ్యారెంటీ, నిజం గెలవాలి యాత్రలపై ఈ భేటీలో చర్చించినట్లు తెలుస్తోంది. సీట్ల పంపకాలు మినహా మిగతా విషయాలపై ప్రాధమిక అవగాహనకు వచ్చినట్టు తెలుస్తోంది.
