టీడీపీ అధినేత చంద్రబాబు అక్రమ అరెస్టుకు నిరసనగా టీడీపీ నేతలు, కార్యకర్తలు పలు కార్యక్రమాలు చేపట్టిన సంగతి తెలిసిందే. చంద్రబాబుది అక్రమ అరెస్టు అని జగన్ చెవులు మార్మోగేలా ‘మోత మోగిద్దాం’ కార్యక్రమాన్ని విజయవంతంగా నిర్వహించాయి టీడీపీ శ్రేణులు. ఇక, చంద్రబాబు అరెస్టు చీకట్లు తొలగిపోయి వెలుగులు రావాలని కొవ్వొత్తులు వెలిగించి చేపట్టిన ‘కాంతితో క్రాంతి’ కార్యక్రమం ఘన విజయం సాధించింది. చంద్రబాబు అరెస్టుతో ‘న్యాయానికి సంకెళ్లు’ వేశారని చేతులకు సంకెళ్లు, తాళ్లు కట్టుకొని చేపట్టిన కార్యక్రమం దిగ్విజయంగా ముగిసింది.
ఈ క్రమంలోనే తాజాగా మరో వినూత్న నిరసన కార్యక్రమానికి టీడీపీ పిలుపునిచ్చింది. చంద్రబాబును అక్రమంగా అరెస్టు చేయించిన జగన్మోహన్ రెడ్డి ‘కళ్లు తెరిపిద్దాం’ అంటూ సరికొత్త కార్యక్రమానికి టీడీపీ నేతలు పిలుపునిచ్చారు. అక్టోబరు 29వ తేదీ ఆదివారం రాత్రి 7 గంటల నుంచి 7.05 గంటల వరకు కళ్లకు గంతలు కట్టుకుని, వాకిళ్లు, బాల్కనీలు, వీధుల్లోకి వచ్చి చంద్రబాబుకు మద్దతుగా “నిజం గెలవాలి” అంటూ ప్లకార్డులు పట్టుకొని గట్టిగా అరవాలని ప్రజలకు టీడీపీ పిలుపునిచ్చింది. జగనాసుర చీకటి పాలనకు నిరసనగా చేపడుతున్న ఈ కార్యక్రమంలో పాల్గొన్న వారు, వీడియో తీసి సోషల్ మీడియాలో పంచుకోవాలని కోరింది.
