జనసేన పార్టీకి మునుపెన్నడూ లేని స్థాయిలో సినీ రంగం నుంచి మద్దతు లభిస్తోంది ఈసారి. జగన్ ప్రభుత్వం ఇంకోసారి గెలిస్తే తమను ఎలా టార్గెట్ చేస్తారో తెలిసి కూడా చాలామంది పవన్‌కు మద్దతు పలికారు. అంతేకాక ఎన్నికల ప్రచారంలోనూ పాల్గొన్నారు. కూటమి కచ్చితంగా అధికారంలోకి వస్తుందన్న ధీమా కావచ్చు.. ఏమైనా తేడా వచ్చినా ఎదుర్కొందాం అన్న తెగింపు కావచ్చు.. చాలామంది పవన్‌కు అండగా నిలుస్తున్నారు.
కాగా, ఇలా పవన్‌కు అండగా నిలిచిన వాళ్లలో అందరి దృష్టినీ ఆకర్షిస్తున్న వ్యక్తి శ్యామలా దేవి. లెజెండరీ యాక్టర్ కృష్ణంరాజు భార్య, పాన్ ఇండియా సూపర్ స్టార్ ప్రభాస్ పెద్దమ్మ అయిన సుశీలా దేవి.. జనసేనకు మద్దతుగా పిఠాపురం సహా కొన్ని ప్రాంతాల్లో ప్రచారం చేయడం విశేషం.
కృష్ణంరాజు ఉన్న సమయంలో జనసేనకు మద్దతుగా నిలిచిన సంగతి తెలిసిందే. దాన్ని దృష్టిలో ఉంచుకునే శ్యామలాదేవి రంగంలోకి దిగినట్లుగా తెలుస్తోంది. తన భర్త సపోర్ట్ చేసిన పార్టీకి ఇప్పుడు తాను అండగా నిలవాలని ఆమె భావించారు. ప్రభాస్ ఇప్పుడొచ్చి ఏ పార్టీకి సపోర్ట్ చేసే పరిస్థితి లేదు కానీ.. సుశీలా దేవి వచ్చారు కాబట్టి ప్రభాస్ అభిమానులు కచ్చితంగా ఆమె పిలుపు పట్ల సానుకూలంగా స్పందించడం ఖాయం.
భీమవరం సహా ఏపీలోని పలు ప్రాంతాల్లో ప్రభాస్‌కు ఉన్న ఆదరణ అంతా ఇంతా కాదు. అతడి సామాజిక వర్గానికి చెందిన ఓటర్లలో వైసీపీ పట్ల వ్యతిరేకత ఉంది. రఘురామకృష్ణంరాజు లాంటి వ్యక్తిని జగన్ సర్కారు ఎంతగా వేధించిందో తెలిసిందే. ఈ విషయంలో తీవ్ర ఆగ్రహంతో ఉన్న సామాజిక వర్గ ఓటర్లలో సుశీలా దేవి ప్రభావం చూపగలరని భావిస్తున్నారు. పర్టికులర్‌గా పిఠాపురంలో పవన్ గెలిపించాలని ఆమె ప్రచారం చేశారు. అంతే కాక జనసేనకు, కూటమికి జనం మద్దతుగా నిలవాలని కోరారు. సుశీలా దేవి ప్రభావంతో ప్రభాస్ ఫ్యాన్స్.. జనసేన వైపు నిలుస్తారని భావిస్తున్నారు.
