విశ్వ విఖ్యాత నట సార్వభౌమ నందమూరి తారక రామారావు నట వారసుడిగా జూనియర్ ఎన్టీఆర్ టాలీవుడ్ లోని స్టార్ హీరోలలో ఒకరిగా నీరాజనాలు అందుకుంటున్న సంగతి తెలిసిందే. ‘బాల రామాయణం’తో బాల నటుడిగా తెరంగేట్రం చేసిన తారక్…ఆ తర్వాత అంచెలంచెలుగా ఎదిగి తాతకు తగ్గ మనవడిగా తండ్రికి తగ్గ తనయుడిగా ప్రశంసలందుకుంటున్నాడు. ‘స్టూడెంట్ నెం.1’తో హిట్ బాట పట్టిన తారక్ ఆ తర్వాత తిరుగులేని మనిషిగా ఎదిగి తాతలాగే కథానాయకుడిగా వెండితెరపై వెలిగిపోతూ ఆర్ఆర్ఆర్ తో త్వరలో మరో హిట్ కొట్టబోతున్నాడు.
ఓ వైపు వరుస సినిమాలతో బిజీగా ఉంటూ వెండితెర ప్రేక్షకులను అలరిస్తోన్న తారక్… ‘బిగ్ బాస్’ వంటి రియాలిటీ షోకు హోస్ట్ గా వ్యవహరించి బుల్లితెర ప్రేక్షకులనూ ఆకట్టుకుంటున్నాడు. ప్రస్తుతం ‘ఆర్ఆర్ఆర్’ వంటి భారీ పాన్ ఇండియా మల్టీ స్టారర్ లో నటిస్తోన్న తారక్…మరోవైపు’ఎవరు మీలో కోటీశ్వరులు’ అనే రియాలిటీ షోకు హోస్ట్ గా వ్యవహరిస్తూ సత్తా చాటుతున్నాడు.
ఇలా ఇంతింతై…వటుడింతై అన్న రీతిలో తాతకు తగ్గ మనవడిగా ఎదిగిన తారక్ మే20న 38వ పడిలోకి అడుగుపెట్టబోతున్నాడు. దీంతో, తారక్ అభిమానులు సోషల్ మీడియాలో ఒకరోజు ముందే బర్త్ డే హంగామా స్టార్ట్ చేశారు. బర్త్ డే సమయానికి రికార్డు స్థాయిలో ట్వీట్లతో ట్రెండ్ సృష్టించి బహుమతిగా ఇవ్వాలని తారక్ ఫ్యాన్స్ డిసైడ్ అయ్యారు. ఈ సోషల్ మీడియా జమానాలో హ్యాష్ ట్యాగ్ లతో మొదలైన ట్రెండ్ లో తారక్ అభిమానులు సరికొత్త రికార్డులు సృష్టించేందుకు రెడీ అయ్యారు.
#HappyBirthdayNTR తో పాటు పలు హ్యాష్ ట్యాగ్లతో ఎన్టీఆర్ ఫ్యాన్స్ ట్విటర్లో కూత పెట్టేస్తున్నారు. గత ఏడాది దాదాపు 21 మిలియన్లకు పైగా ట్వీట్లతో తారక్ ఫ్యాన్స్ ఆల్ ఇండియా రికార్డు బ్రేక్ చేశారు. భారత్ లో మరే హీరో సాధించని ఘనతను తమ అభిమాన హీరోకు తారక్ అభిమానులు కట్టబెట్టారు. మరి ఈసారి ఆ రికార్డును తారక్ అభిమానులు తిరగరాస్తారా లేదా అన్నది వేచి చూడాలి.
