ఆర్ఆర్ఆర్ సినిమా సంక్రాంతి బరిలో నుంచి తప్పుకోవడంతో టాలీవుడ్ లో ఒక్కసారిగా పరిస్థితులు మారిపోయాయి. పలు సినిమాల విడుదలపై రకరకాల ఊహాగానాలు వినిపిస్తున్నాయి. ఆ సినిమా కోసం విడుదలను వాయిదా వేసుకున్న భీమ్లా నాయక్…సంక్రాంతికి రిపోర్ట్ చేయబోతున్నాడని పుకార్లు షికార్లు చేస్తున్నాయి. అయితే, ఈ విషయం గురించి చిత్ర యూనిట్ నుంచి అధికారికంగా ఓ ప్రకటన విడుదల కాలేదు. ఇంకా, సీజీ, పెండింగ్ వర్క్ పూర్తికావడానికి 15 రోజులు పట్టే అవకాశముండడంతో భీమ్లా నాయక్ వచ్చే అవకాశాలు తక్కువని తెలుస్తోంది.
ఇక, ఆర్ఆర్ఆర్ కోసం విడుదల తేదీ మార్చుకున్న మహేష్ బాబు సర్కార్ వారి పాట చిత్రం మాత్రం సంక్రాంతికి వచ్చే అవకాశం లేదని తెలుస్తోంది. అయితేనేం, మామ స్థానంలో మేనల్లుడు సంక్రాంతి బరిలో దిగబోతున్నాడు. సూపర్ స్టార్ మహేష్ బాబు మేనల్లుడు, గుంటూరు ఎంపీ, టీడీపీ నేత గల్లా జయదేవ్ తనయుడు అశోక్ గల్లా ఈ సంక్రాంతికి ‘హీరో’గా ప్రేక్షకుల ముందుకు రాబోతున్నాడు. గల్లా అశోక్ తెరంగేంట్రం చేస్తున్న ఈ సినిమాలో నిధి అగర్వాల్ సందడి చేయనుంది.
వాస్తవానికి ఈ సినిమాను జనవరి 26న విడుదల చేయాలని అనుకున్నారు. అయితే, ‘ఆర్ఆర్ఆర్’ వాయిదా పడటంతో ఒమిక్రాన్ నేపథ్యంలో ముందుగానే విడుదల చేయబోతున్నారట. “ఈ సంక్రాంతికి థియేటర్లలో దీపావళి టపాసుల్లాంటి వినోదానికి సిద్ధం అవ్వండి. జనవరి 15న గ్రాండ్‌గా ‘హీరో’ విడుదల అవుతుంది” అని అశోక్ గల్లా ట్వీట్ చేశాడు. సూపర్ స్టార్ కృష్ణ, గల్లా అరుణకుమారి సమర్పణలో అమర్ రాజా మీడియా అండ్ ఎంటర్టైన్మెంట్ పతాకంపై పద్మావతి గల్లా ‘హీరో’ సినిమాను నిర్మిస్తున్నారు.
శ్రీరామ్ ఆదిత్య ఈ సినిమాకు దర్శకత్వం వహిస్తుండగా…జిబ్రాన్ సంగీతం అందించారు. మరి, నటనలో అశోక్ తాతకు తగ్గ మనవడిగా…మామకు తగ్గ మేనల్లుడిగా పేరు తెచ్చుకుంటాడో లేదో చూడాలంటే మరి కొద్ది రోజులు ఓపిక పట్టాల్సిందే.
