బాలీవుడ్ బ్యూటీ జాన్వీ కపూర్ టాలీవుడ్ లో వరుస ప్రాజెక్టులను లైన్ లో పెడుతున్న సంగతి తెలిసిందే. ఇప్పటికే ఆమె చేతిలో రెండు భారీ చిత్రాలు ఉన్నాయి. అందులో దేవర ఒకటి కాగా.. మరొకటి ఆర్సీ 16. వీటిలో యంగ్ టైగర్ ఎన్టీఆర్, కొరటాల శివ కాంబినేషన్‌లో రూపుదిద్దుకుంటున్న దేవర చిత్రం రెండు భాగాలుగా రాబోతోంది. అలాగే మెగా పవర్ స్టార్ రామ్ చరణ్, డైరెక్టర్ బుచ్చిబాబు కలయికలో ఆర్సీ 16 త్వరలోనే సెట్స్ మీద‌కు వెళ్ల‌బోతోంది.
అయితే ఇంతలోనే జాన్వీ కపూర్ తెలుగులో మరో చిత్రానికి గ్రీన్ సిగ్నల్ ఇచ్చినట్లు గత నాలుగు రోజుల నుంచి జోరుగా ప్రచారం జరుగుతోంది. ద‌స‌రా వంటి బిగ్గెస్ట్ బ్లాక్ బ‌స్ట‌ర్ అనంత‌రం న్యాచుర‌ల్ స్టార్ నాని, డైరెక్టర్ శ్రీ‌కాంత్ ఓదెల కాంబినేష‌న్ మ‌రోసారి రిపీట్ కాబోతోంది. శ్రీ‌కాంత్ ఓదెల త‌న నెక్స్ట్ ఫిల్మ్ ను కూడా నానితోనే చేయ‌బోతున్నాడు.
ఈ చిత్రాన్ని ఎస్‌ఎల్‌వి సినిమాస్ బ్యాన‌ర్ పై సుధాకర్ చెరుకూరి నిర్మించ‌బోతున్నారు. ఈ ఏడాది చివర్లో చిత్రీకరణ ప్రారంభం అవుతుంది. అయితే ఈ సినిమాలో నానికి జోడిగా జాన్వీ కపూర్ ను ఎంపిక చేశార‌నే వార్త‌లు నెట్టింట జోరుగా చ‌క్క‌ర్లు కొడుతున్నాయి. దీంతో అభిమానులు సోష‌ల్ మీడియా ద్వారా జాన్వీ కపూర్ హీరోయిన్ గా వ‌ద్దే వ‌ద్దంటూ నానికి స్పెష‌ల్ రిక్వెస్ట్‌లు చేస్తున్నారు. `అన్నా నీ ప‌క్క‌న జాన్వీ అస్స‌లు సెట్ కాదు.. ఆమె నీకు అక్క‌లా ఉంటుంది..` అని నానికి స‌ల‌హాలు ఇస్తున్నారు. జాన్వీ కపూర్ కు బ‌దులు మరో హీరోయిన్ ను తీసుకోవ‌డం బెట‌ర్ అని చెబుతున్నారు. ఫ్యాన్స్ రిక్వెస్ట్‌ల‌తో నానికి కొత్త తలనొప్పి మొద‌లైంద‌ని ఇన్‌సైడ్ టాక్ న‌డుస్తోంది.
