మెగాస్టార్ చిరు హీరోగా నటించిన వాల్తేరు వీరయ్య ట్రైలర్ దీపావళి సందర్భంగా విడుదలైంది. చిరు గాడ్ ఫాదర్ చిత్రం విడుదలైన అన్ని సెంటర్లలోనూ మంచి వసూళ్లు రాబట్టి హిట్ చిత్రంగా నిలిచింది.
లూసిఫర్ మలయాళం చిత్రం రీమేక్ గా వచ్చిన గాడ్ ఫాదర్ లో చిరంజీవి ఇమేజ్ కు తగ్గట్టుగా పాత్ర తీరు లేదు. అయినా సరే ప్రేక్షకులు ఈ చిత్రానికి బ్రహ్మరథం పట్టారు. ఈ నేపథ్యంలోనే చిరుకి భారీగా ఉన్న మాస్ ఇమేజ్ నేపథ్యంలో తెరకెక్కుతున్న వాల్తేరు వీరయ్య చిత్రంపై భారీ అంచనాలు ఉన్నాయి.
యువ దర్శకుడు బాబీ తెరకెక్కిస్తున్న వాల్తేరు వీరయ్య చిత్రంలో చిరు పాత్ర మాస్ కు పూనకాలు తెప్పిస్తుందని టాక్ ఉంది. ఈ క్రమంలోనే తాజాగా ఆ చిత్రం నుంచి టైటిల్ పోస్టర్ ను దీపావళి సందర్భంగా చిత్ర యూనిట్ రిలీజ్ చేసింది. ఇన్నాళ్లుగా వస్తున్నపుకార్లకు తగ్గట్టుగానే చిరు, బాబీల కాంబోలోని ఈ సినిమాకు వాల్తేరు వీరయ్య టైటిల్ ఖరారు చేశారు. తనని సవాల్ చేసిన వారికి తనదైన స్టైల్ లో సమాధానం చెబుతున్న వీరయ్యకు సంబంధించిన ఫస్ట్ గ్లింప్స్ ను చిత్ర యూనిట్ రిలీజ్ చేసింది.
ఓ యాక్షన్ సీన్ కు సంబంధించిన టీజర్ విడుదల చేసింది. రంగుల బనియన్, పూల చొక్కా, పైకి ఎగ్గట్టిన లుంగి, చెవికి రింగులు, మెడలో బంగారు చైన్లు, చేతికి బంగారు కడియం, మరో చేతికి గోల్డ్ వాచ్ , ఇక నల్ల కళ్ళద్దాలతో కనిపిస్తూ బీడీ తాగుతున్న చిరు మాస్ లుక్ సోషల్ మీడియాలో వైరల్ గా మారింది. యూట్యూబ్ వీడియోస్ చేసే అలవాటున్న వీరయ్యగా చిరు కనిపించబోతున్నారని ఈ టీజర్ ను బట్టి అర్థమైంది.
‘‘ఇలాంటి ఎంటర్టైనింగ్ ధమాకాలు ఇంకా చూడాలనుకుంటే లైక్ షేర్ అండ్ సబ్ స్క్రైబ్ చేయండి’’ అంటూ లైవ్ లోనే చిరు చేస్తున్న వీడియో వైరల్ గా మారింది. ఇక, రాబోయే ఏడాది సంక్రాంతి సందర్భంగా వాల్తేరు వీరయ్య బరిలోకి దిగుతున్నాడు. అదే సమయంలో నందమూరి నటసింహ బాలకృష్ణ నటిస్తున్న వీర సింహారెడ్డి చిత్రం కూడా విడుదల కాబోతుండడంతో సంక్రాంతి బరిలో చిరు, బాలయ్యల మధ్య గట్టి పోటీ ఏర్పడింది.
