‘మా’ అధ్యక్ష ఎన్నికలు టాలీవుడ్ లో కొద్ది నెలలుగా హాట్ టాపిక్ గా మారిన సంగతి తెలిసిందే. విలక్షణ నటుడు ప్రకాష్ రాజ్ అధ్యక్ష పదవి బరిలో నిలవడంతో ఇండస్ట్రీలో లోకల్, నాన్ లోకల్ అన్న చర్చ మొదలైంది. ప్రకాష్ రాజ్ కు మెగా బ్రదర్ నాగబాబు మద్దతు ప్రకటించడంతో మెగాస్టార్ చిరంజీవి సపోర్ట్ కూడా ప్రకాష్ రాజ్ కు ఉందన్న ప్రచారం సినీ వర్గాల్లో జోరుగా జరిగింది. నిబంధనలు ఉల్లంఘించిన వారిపై చర్యలు తీసుకోవాలంటూ మా క్రమశిక్షణ సంఘం అధ్యక్షుడు కృష్టంరాజుకు చిరు బహిరంగ లేఖ రాయడం చర్చనీయాంశమైంది.
ఈ నేపథ్యంలోనే తాజాగా చిరంజీవిని ప్రకాష్ రాజ్ కలవడం చర్చనీయాంశమైంది. చిరంజీవిని జిమ్ లో కలిసిన ప్రకాష్ రాజ్…ఆ తర్వాత చేసిన ట్వీట్ ఆసక్తిని రేకెత్తించింది. అన్నయ్య తమకు స్పూర్తి అపి చిరంజీవిపై ప్రకాష్ రాజ్ ప్రశంసల జల్లు కురిపించారు. ఇండస్ట్రీకి అన్నయ్య ఓ వరం అని, సినీ పరిశ్రమ ఎదుర్కొంటోన్న కష్టాలు తీర్చడానికి ప్రయత్నిస్తున్నారని పొగడ్తలతో ముంచెత్తారు ప్రకాష్ రాజ్. ఓ వైపు మా ఎన్నికల్లో ప్రకాష్ రాజ్ అభ్యర్థి కావడం, ఈ సమయంలో చిరును పొగడ్తలతో ముంచెత్తడం చర్చనీయాంశమైంది.
అయితే, సినీ రంగ సమస్యలపై చర్చించేందుకు చిరును సీఎం జగన్ ఆహ్వానించిన సంగతి తెలిసిందే. ఆ నేపథ్యంలోనే ఇటీవల తన నివాసంలో సినీ నిర్మాతలు, దర్శకులు, హీరోలతో చిరు ఓ సమావేశం నిర్వహించారు. ఈ మీటింగ్‌ కోసం చిరు తీసుకున్న చొరవ, గతంలోనూ సినీరంగ సమస్యలపై జగన్ తో భేటీ కావడం వంటి కారణాల నేపథ్యంలోనే చిరుపై ప్రకాష్‌రాజ్ ఆ ట్వీట్ చేశారు. అయితే, ఎన్నికల్లో అన్నయ్య మద్దతు తనకే ఉందని చెప్పేందుకే ప్రకాష్ రాజ్ ఈ ఫొటోను షేర్ చేశారని నెటిజన్లు ఆ ఫొటోను వైరల్ చేస్తూ కామెంట్లు పెడుతున్నారు.
