బండ్ల గణేష్….టాలీవుడ్ లో కమెడియన్ గా, క్యారెక్టర్ ఆర్టిస్ట్ గా కెరీర్ మొదలుపెట్టిన బండ్లన్న…అనతి కాలంలోనే బడా నిర్మాతగా ఎదిగారు. పవర్ స్టార్ పవన్ కళ్యాణ్ వీరాభిమాని అయిన బండ్ల గణేష్…ఆయనను దేవుడు అంటూ ఆకాశానికి ఎత్తేస్తుంటారు. అంతేకాదు, పొలిటికల్ గా కూడా పవన్ ను బండ్ల గణేష్ వెనకేసుకొస్తుంటారు. ప్రత్యర్థి పార్టీలకు చెందిన కొందరు నేతలు పవన్ ను విమర్శించినప్పుడు వారికి బండ్ల గణేష్ గట్టిగా కౌంటర్లు ఇచ్చిన సందర్భాలున్నాయి.
అయితే, కొంతకాలంగా పవన్ తో బండ్ల గణేష్ కు చెడిందని, అందుకు త్రివిక్రమ్ శ్రీనివాసే కారణమని గట్టిగా ప్రచారం జరుగుతోంది. ఆ ప్రచారానికి తగ్గట్లుగానే భీమ్లా నాయక్ ప్రీ రిలీజ్ ఈవెంట్ కు బండ్ల హాజరు కాలేదు. ఇక, కొంతకాలంగా త్రివిక్రమ్ శ్రీనివాస్ పై పరోక్షంగా బండ్ల గణేష్ విమర్శలు గుప్పిస్తున్న సంగతి తెలిసిందే. అయితే, బండ్ల గణేష్ ట్వీట్ లపై, పరోక్షంగా ఆయన చేస్తున్న విమర్శలపై త్రివిక్రమ్ శ్రీనివాస్, పవన్ కళ్యాణ్ స్పందించలేదు. ఈ నేపథ్యంలోనే తాజాగా గురుపూర్ణిమ సందర్భంగా బండ్ల గణేష్ మరోసారి సంచలన వ్యాఖ్యలు చేశారు.
ఇకపై పవన్ పేరును గాని, కీర్తిని గాని వాడుకొని లబ్ధి పొందనని, పొందడానికి ప్రయత్నించనని బండ్ల గణేష్ అన్నారు. వీలైతే పవన్ కళ్యాణ్ కు సహాయంగా ఉంటానని లేకుంటే దూరంగా ఉంటానని షాకింగ్ కామెంట్ చేశారు. గురు పూర్ణిమ సందర్భంగా గురువు సాక్షిగా చెబుతున్నానని అన్నారు. తన ఆశ ఒకటే అని, పవన్ అనుకున్న ఆశయం సాధించాలని గణేష్ ఆకాంక్షించారు. నిస్వార్ధమైన మనసులాగే పదికాలాలపాటు పవన్ అభివృద్ధి చెందాలని కోరుకున్నారు.
పవన్ కి గురు పౌర్ణమి శుభాకాంక్షలు చెప్పిన బండ్ల గణేష్ పవన్ ఆయన లాగే ఉండాలని ఆయన అనుకున్నవన్నీ సాధించాలని కోరుకున్నారు. కసితో, కృషితో అవన్నీ సాధిస్తారని ఆకాంక్షించారు. పవన్ స్థాయి ఏంటో స్థానం ఏంటో తనకు తెలుసు అని ఆకాశానికి ఎత్తేశారు. పవన్ గురూజీ అయిన త్రివిక్రమ్ పై బండ్ల గణేష్ పరోక్షంగా చేస్తున్న విమర్శల నేపథ్యంలోనే తాజాగా పవన్ కు కూడా దూరంగా ఉండాలని బండ్ల గణేష్ నిర్ణయించుకున్నారని నెటిజన్లు కామెంట్స్ చేస్తున్నారు.
