ఒక ప్రైవేటు సంస్థ తాము చేపట్టిన సర్వే వివరాల్ని ప్రెస్ మీట్ పెట్టి మరీ ప్రకటించటం.. దానికి ప్రధాన మీడియా సంస్థలు సైతం ప్రాధాన్యత ఇవ్వటం తెలిసిందే. ఇదిలా ఉంటే.. ఈ సర్వేలో అధికార టీఆర్ఎస్ ఓటు బ్యాంకు తగ్గిందని.. అదే సమయంలో బీజేపీ ఓటు బ్యాంక్ పెరిగిందన్న విషయాన్ని గణాంకాల రూపంలో వెల్లడించారు. అంతేకాదు.. ఉమ్మడి జిల్లాలను ప్రాతిపదికగా తీసుుకొని.. ఏయే జిల్లాల్లో ఏయే పార్టీల మధ్య పోటీ ప్రధానంగా ఉంటుందన్న విషయాన్ని చెప్పుకొచ్చారు.
ఇదిలా ఉంటే.. ఈ సర్వే పై తాజాగా తెలంగాణ రాష్ట్ర బీజేపీ అధ్యక్షులు బండి సంజయ్ స్పందించారు. కేసీఆర్ కుటుంబ పాలన.. ప్రభుత్వ ప్రజా వ్యతిరేక విధానాలపై బీజేపీ చేస్తున్న పోరాటాలను ప్రజలు నమ్ముతున్నారన్నారు. అందుకే గ్రాఫ్ పెరిగిందన్న ఆయన.. ‘బీజేపీ ఓటు బ్యాంకు ఆరు శాతం నుంచి 30 శాతానికి పెరగటం మామూలు విషయం కాదు. బీజేపీ గ్రాఫ్ పెరిగితే టీఆర్ఎస్ గ్రాఫ్ తగ్గింది. మరో 8 శాతం ఓట్లను పెంచుకోవటం బీజేపీకి కష్టం కాదు. ప్రజలు మా పోరాటాల్ని గమనిస్తున్నారు’ అని వ్యాఖ్యానించారు.
జగిత్యాల జిల్లా కోరుట్లకు చెందిన వ్యాపారవేత్త మహిపాల్ రెడ్డి.. లోక్ సత్తాతో సహా ఇతర పార్టీలకు చెందిన నేతలు.. కార్యకర్తలు పార్టీ మారిన నేపథ్యంలో మాట్లాడిన బండి సంజయ్.. సీఎం కేసీఆర్ ఇకనైనా మొద్దు నిద్ర లేవాలన్నారు. గత ఎన్నికల్లో ఇచ్చిన హామీల్ని నెరవేర్చాలని.. రైతులకు ఇచ్చిన రుణమాఫీ హామీని నెరవేర్చాలన్నారు. తాజా సర్వే ఫలితం కమలనాథులకు మరింత హుషారు కలిగించిందన్న విషయం బండి మాటల్ని విన్నంతనే అర్థం కాక మానదు.
Comments 1