‘అఖండ’ సాధించిన అఖండ విజయంతో నందమూరి నటసింహం బాలకృష్ణ మంచి ఊపు మీదున్న సంగతి తెలిసిందే. అఖండ ఇచ్చిన కిక్ తో బాలయ్య బాబు వరుస సినిమాలతో ప్రేక్షకులను, అభిమానులను అలరించేందుకు సిద్ధమవుతున్నారు. ప్రస్తుతం గోపీచంద్ మలినేని దర్శకత్వంలో తెరకెక్కుతున్న సినిమా షూటింగ్ లో బాలయ్య బిజీగా ఉన్నారు. ఇటీవల ఆ చిత్రం నుంచి విడుదలైన ఫస్ట్ లుక్ వైరల్ అయింది.
ఇలా ఓ పక్క వరుస సినిమాలతో క్షణం తీరిక లేకుండా ఉన్న బాలయ్య….తాజాగా మరో స్టార్ హీరో సినిమాలోనూ కీలక పాత్ర పోషించేందుకు రెడీ అవుతున్నారట. టాలీవుడ్ దర్శక ధీరుడు రాజమౌళి, టాలీవుడ్ సూపర్ స్టార్ మహేష్ బాబుల కాంబోలో తెరకెక్కబోతోన్న సినిమాలో బాలయ్య ఓ క్యామియో రోల్ లో కనిపించబోతున్నాడట. ఈ విషయం గురించి బాలయ్యను ఒప్పించే పనిలో జక్కన్న బిజీగా ఉన్నాడట.
మహేష్ బాబు సినిమాలో కీలకమైన ఓ పవర్ఫుల్ రోల్ ఉందని, ఆ పాత్రలో బాలకృష్ణ నటిస్తే అది మరింత పవర్ ఫుల్ గా ఉంటుందని రాజమౌళి, మహేష్ బాబు అనుకున్నారు. దీంతో, బాలయ్య బాబుతో రాజమౌళి మంతనాలు జరుపుతున్నారట. గతంలో మోహన్ బాబు ఫ్యామిలీతో ఉన్న స్నేహబంధం కారణంగా ‘ఊ కొడతారా ఉలిక్కిపడతారా’ చిత్రంలో బాలయ్య ఓ కీలక పాత్ర పోషించిన సంగతి తెలిసిందే. మహేష్ బాబుతోనూ బాలయ్యకు మంచి అనుబంధం ఉన్న నేపథ్యంలో ఈ సినిమాలోనూ బాలయ్య క్యామియో రోల్ లో కనిపించే అవకాశాలున్నాయని టాక్ వస్తోంది. ఇటీవల బాలకృష్ణ ‘అన్ స్టాపబుల్’ టాక్ షోలో రాజమౌళి, మహేష్ బాబులతో బాలయ్య సందడి చేసిన సంగతి తెలిసిందే.
