సినీ ఇండస్ట్రీలో తమకు మంచి సినిమా చేసి పెట్టిన, హిట్ ఇచ్చిన దర్శకుడికి ఇంకో సినిమా చేస్తానని ప్రామిస్ చేయడం కొందరికి అలవాటు. అయితే, గతంలో తమతో సినిమా తీసిన దర్శకుడు వరుస ప్లాపులతో ఇబ్బందులు పడుతున్న సమయంలో ఆ ప్రామిస్ ని నిలబెట్టమని అడిగితే కొందరు మాత్రమే మాట తప్పకుండా స్పందిస్తారు. గతంలో, ఓ టాలీవుడ్ స్టార్ హీరోకు మంచి హిట్ ఇచ్చిన దర్శకుడు కష్టాల్లో ఉన్న సమయంలో ఆ స్టార్ హీరో ఇచ్చిన మాట తప్పడం చర్చనీయాంశమైంది.
కానీ, అందరు హీరోలు అలా ఉండరు అని టాలీవుడ్ సీనియర్ హీరో, నందమూరి నటసింహం బాలకృష్ణ ప్రూవ్ చేశారు. గతంలో టాలీవుడ్ విలక్షణ దర్శకుడు పూరి జగన్నాథ్ కు మాట ఇచ్చిన విధంగానే ఇప్పుడు ఆయనతో సినిమా చేసేందుకు బాలయ్య బాబు రెడీ అవుతున్నారు. బాలకృష్ణ, పూరీ జగన్నాథ్ ల కాంబినేషన్లో ‘పైసా వసూల్’ తెరకెక్కిన సంగతి తెలిసిందే. అయితే ఫ్యాన్స్ ను విపరీతంగా ఆకట్టుకున్న ఆ సినిమా…బాక్సాఫీస్ దగ్గర కలెక్షన్లు రాబట్టలేకపోయింది.
అయినా, సరే ఆ సినిమా షూటింగ్స్ సమయంలోనే పూరీతో మరో సినిమా చేస్తానని బాలయ్య వాగ్దానం చేశారు. కట్ చేస్తే ప్రస్తుతం ‘అఖండ’ వంటి బ్లాక్ బస్టర్ హిట్టుతో బాలయ్య మంచి ఫామ్ లో ఉన్నాడు. కానీ, ‘లైగర్’ వంటి భారీ డిజాస్టర్ తో పూరి ఫామ్ కోసం తంటాలు పడుతున్నాడు. ఇటువంటి సమయంలో పూరీకి బాలయ్య ఆఫరిస్తాడా అని చాలామంది సందేహం వ్యక్తం చేశారు. కానీ, గతంలో తాను ఇచ్చిన మాటకు కట్టుబడిన బాలయ్య బాబు పూరితో సినిమాకు గ్రీన్ సిగ్నల్ ఇచ్చినట్టు తెలుస్తోంది.
బాలయ్యకు ఆ సినిమా లైన్ కూడా పూరి జగన్నాథ్ వివరించారని అంటున్నారు. దీంతో, ప్లాప్ లతో ఉన్నా సరే ఆ దర్శకుడికి తాను ఇచ్చిన మాట కోసం నిలబడ్డ బాలయ్యపై ప్రశంసలు వెల్లువెత్తుతున్నాయి. అయితే, పూరీతో సినిమా చేసి బాలయ్య రిస్క్ చేస్తున్నాడేమోనని కొందరు ఫ్యాన్స్ భయపడుతున్నారు. కానీ, హిట్, ప్లాప్ లు ఇండస్ట్రీలో సహజమని, కానీ, ఇచ్చిన మాట నిలబెట్టుకోవడం ద్వారా బాలయ్య మాటకు, మనుషులకు ఎంత విలువివ్వాలో బాలయ్య చాటి చెబుతున్నారని మరికొందరు అభిమానులు అంటున్నారు.
