మాజీ మంత్రి, టీడీపీ సీనియర్ నేత చింతకాయల అయ్యన్నపాత్రుడు అరెస్ట్ అయ్యారు. అనకాపల్లి జిల్లా నర్సీపట్నంలోసెక్షన్ సీఆర్పీసీ 50a ప్రకారం సీఐడీ పోలీసులు నోటీసులు ఇచ్చి అయ్యన్నపాత్రుడు, ఆయన చిన్న కుమారుడు రాజేష్‌ను అరెస్టు చేశారు. ఇటీవల గోడ కూల్చిన వివాదంలో అయ్యన్నపాత్రుడు కోర్టుకు సమర్పించిన డాక్యుమెంట్లు, నకిలీ డాక్యుమెంట్లుగా సీఐడీ పోలీసులు కేసు నమోదు చేశారు. మంగళగిరి సీఐడీ పోలీస్ స్టేషన్లో నమోదైన కేసులో అరెస్ట్ చేసినట్లు నోటీసుల్లో పేర్కొన్నారు. సెక్షన్ 464, 467, 471, 474, 34 ఐపిసి సెక్షన్ల కింద నాన్ బెయిలబుల్ కేసు నమోదు చేశారు. అయ్యన్నపాత్రుడు, కుమారుడు రాజేష్‌ను ఏలూరు కోర్టులో వీరిద్దరిని హాజరు పరచనున్నట్లు నోటీసులో సీఐడీ పోలీసులు పేర్కొన్నారు.
వేకు జామున 3 గంటల ప్రాంతంలో దొంగల్లా గోడ దూకి వచ్చారని..తలుపులు పగలగొట్టి ఇంటి లోపలికి వచ్చేందుకు ప్రయత్నించారని అయ్యన్న పాత్రుడు భార్య పద్మావతి ఆరోపించారు. తన చిన్న కుమారుడు రాజేష్ తలుపులు తీసి ఏం కావాలని అడిగారని.. సమాధానం చెప్పకుండా రాజేష్‌నుస్వామి మాలలో ఉన్నారని కూడా చూడకుండా ఈడ్చుకుని వెళ్లిపోయారన్నారు. పోలీసులు తాగి వచ్చి దుర్భాషలాడారని.. అయ్యన్నపాత్రుడు కూడా వచ్చి ఎందుకు అరెస్టు చేస్తున్నారంటూ ఎఫ్ఐఆర్ కాపీ అడిగారన్నారు. FIR కాపీ కూడా చూపించకుండా నోటీస్ ఇచ్చి అరెస్టు చేశారన్నారు. ఇదేమన్నా బ్రిటిష్ పాలన… ఇలాంటి పరిస్థితి ఏ రాజకీయ నాయకుడికి రాకూడదన్నారు. ఈ ప్రభుత్వం నుంచి తన కుమారుడురాజేష్, అయ్యన పాత్రుడికి ప్రాణహాని ఉందన్నారు.
కనీసం మాట్లాడనివ్వలేదు.. కనీసం కాళ్లకు చెప్పులు కూడా వేసుకోనివ్వకుండా పోలీసులు జీపు ఎక్కించుకుని తీసుకెళ్లారని అయ్యన్నపాత్రుడు సతీమణి మండిపడ్డారు. ఇదేం రాజకీయం తెలియడంలేదని.. బ్రిటీష్ పాలన కంటే దారుణంగా ఉందని.. ఇంత దౌర్జన్యం, ఇంతటి దారుణ పరిస్థితులు ఈ 43 ఏళ్ల రాజకీయాల్లో ఎప్పుడూ చూడలేదన్నారు. అయ్యన్నపాత్రుడు, రాజేష్‌ను ఎలా తీసుకెళ్లారో అలాగే తీసుకురావాలని కోరారు. గతంలో అయ్యన్నపాత్రుడి నివాసం దగ్గర ప్రహరీ గోడ విషయంలో వివాదం రేగింది. అయ్యన్న పంట కాలువ స్థలాన్ని ఆక్రమించి గోడ కట్టారని కూల్చివేతకు అధికారులు సిద్ధమయ్యారు. కానీ అయ్యన్న కుటుంబ సభ్యులు అడ్డుకోవడంతో ఉద్రిక్త పరిస్థితులు ఏర్పడ్డాయి.. అనంతరం హైకోర్టులో పిటిషన్ వేయగా అయ్యన్న కుటుంబానికి ఊరట దొరికింది. మళ్లీ అదే కేసులో ఫోర్జరీ డాక్యుమెంట్లు కోర్టుకు సమర్పించారనే అభియోగాలపై అయ్యన్నపాత్రుడితో పాటూ కుమారుడు రాజేష్‌ను సీఐడీ పోలీసులు అరెస్ట్ చేయడం ఆసక్తికరంగా మారింది.
