బుల్లితెర పాపులర్ యాంకర్ గా, సినిమాల్లో ఆర్టిస్ట్ గా రాణిస్తోన్న అనసూయ పేరు నిత్యం వార్తల్లో వినిపిస్తోన్న సంగతి తెలిసిందే. ముఖ్యంగా అనసూయ డ్రెస్సింగ్ గురించి సోషల్ మీడియాలో పెద్ద చర్చే నడుస్తూ ఉంటుంది. అయితే, అనసూయ కూడా నెటిజన్లకు అదే రేంజ్ లో సమాధానమిస్తూ వస్తోంది. ఈ క్రమంలోనే తాజాగా అనసూయ వస్త్రధారణపై టాలీవుడ్ సీనియర్ నటుడు కోటా శ్రీనివాసరావు చేసిన కామెంట్లు కాక రేపుతున్నాయి.
అనసూయ అందగత్తె అని కితాబిచ్చిన కోటా…ఆమె వస్త్రధారణ ఎలా ఉన్నాసరే జనాలు చూస్తారంటూ కాంప్లిమెంట్ ఇచ్చారు. అయితే, కాంప్లిమెంట్ ఇచ్చిన అదే నోటితో కోటా…అనసూయ అలాంటి బట్టలు వేసుకోవాల్సిన పనిలేదంటూ కామెంట్ చేయడం సంచలనం రేపింది. అనసూయ నటన, డ్యాన్స్ నచ్చుతుందన్న కోటా…ఆమె డ్రెస్సింగ్ నచ్చదంటూ కుండబద్దలు కొట్టేశారు. అయితే, అనసూయంటే గౌరవం కాబట్టే ఆమె డ్రెస్సింగ్ మార్చాలంటూ సలహా ఇచ్చానని కోటా తన వ్యాఖ్యలను సమర్థించుకున్నారు.
ఈ నేపథ్యంలోనే తాజాగా కోటా కామెంట్లపై అనసూయ పరోక్షంగా స్పందించింది. తన డ్రెస్సింగ్ గురించి కొందరూ కామెంట్ చేస్తున్నారని, సినిమాల్లో ఇంతకన్నా దారుణంగా వస్త్రధారణ చేసుకుంటున్న వారి గురించి మాట్లాడకుండా తననే టార్గెట్ చేయడంపై అనసూయ ఫైర్ అయింది. నటుడిగా ఎంతో అనుభవమున్న వ్యక్తి తన డ్రెస్సింగ్ ను కించపరుస్తూ మాట్లాడటం సబబు కాదని ఆవేదన వ్యక్తం చేసింది. దుస్తులు ధరించడమన్నది వ్యక్తిగత అంశమని, ఎవరికి నచ్చిన దుస్తులు వారు వేసుకుంటారని, ఒక్కోసారి వృత్తిపరంగానూ విభిన్న దుస్తులు ధరించాల్సి ఉంటుందని వెల్లడించింది.
సోషల్ మీడియా అనవసరమైన విషయాల్ని హైలెట్‌ చేస్తోందని, అదే మీడియా.. ఆ సీనియర్ నటుడు మద్యం సేవిస్తారని, చిరిగిన బట్టలు తొడుక్కుంటారని, ఆన్‌స్క్రీన్‌పై మహిళల్ని కించపరిచే విధంగా ప్రవర్తిస్తారని చెప్పకపోవడంపై అనసూయ పెదవి విరిచింది. పెళ్లై పిల్లలున్న స్టార్‌ హీరోలంతా హీరోయిన్లతో ఆన్‌స్క్రీన్‌ రొమాన్స్ చేస్తున్నారని, దాని గురించి ఎవరూ ప్రశ్నించరని, చొక్కా లేకుండా హీరో శరీరాన్ని చూపిస్తుంటే నోరు మెదపరెందుకని అనసూయ నిలదీశింది. మరి, అనసూయ కామెంట్లకు కోటా స్పందిస్తారా లేదంటే ఈ వివాదాన్ని ఇంతటితో ముగిస్తారా అన్నది ఆసక్తికరంగా మారింది.
