పవన్ ఎంట్రీ ఆచార్య‌లో లేదు..కానీ పవన్ ఎంట్రీ ఈ సినిమా విష‌య‌మై ఉంది..అన్న‌య్య సినిమా కోసం త‌మ్ముడు వ‌స్తున్నాడు ..సామాజిక బాధ్య‌త‌తో చేసిన సినిమాకు త‌న‌వంతు సాయం చేస్తున్నాడు. అన్న‌య్య క‌ష్టం తెలిసిన త‌మ్ముడు ఈ నాలుగేళ్లూ ఆ విధంగానే అన్న‌య్య‌తోనే ఉన్నాడు. నేరుగా లేడు. అన్న‌య్య హృద‌యంలో భాగం అయి ఉన్నాడు. ఆయన స్పంద‌న‌ల్లో ఉన్నాడు. ఆయన కు ఏ క‌ష్టం వ‌చ్చినా చ‌లించిపోయాడు.
ఆ ఇంటి బిడ్డ చరణ్ కు భారీ విజ‌యం ట్రిపుల్ ఆర్ రూపంలో వచ్చిన వేళ మురిసిపోయాడు. అన్న కోసం త‌న ప్రేమ‌ను దాచి ఉంచాడు. ఇదిగో ఈ సినిమా వేళ మ‌రోసారి ఆ ప్రేమ‌నే అన్న‌య్య‌కే కాదు అంద‌రికీ పంచ‌నున్నాడు. ద‌టీజ్ పవన్. అన్న‌య్య కోసం పవన్.. ఆచార్య కోసం పవన్.. బాధ్య‌త అంటే ఇది.. బంధం అంటే ఇదే !
పవర్ స్టార్ పవన్ కళ్యాణ్ కోసం మెగా మల్టీస్టారర్ ‘ఆచార్య’ చిత్రం స్పెషల్ షో వేయనున్నారు అని వార్త‌లొస్తున్నాయి. ఈ వార్త‌లు అటు అన్న‌య్య అభిమానుల‌ను ఇటు త‌మ్ముడి అభిమానుల‌నూ ఊర్రూతలూగిస్తోంది.
మెగాస్టార్ చిరంజీవి, ఆయన కొడుకు రామ్ చరణ్ కలిసి నటించిన భారీ బడ్జెట్ సినిమా ఆచార్య. సెన్సిటివ్ డైరెక్టర్ కొరటాల శివ దర్శకత్వంలో ఈ సినిమా రూపొందింది. మాస్, యాక్షన్ అంశాల నేపథ్యంలో తెరకెక్కిన కథగా ఏప్రిల్ 29 న ప్రేక్షకుల ముందుకు రానుంది . దేవాదాయ ధ‌ర్మాదాయ శాఖలో నెల‌కొన్న అవినీతిని అరికట్టే వ్యక్తులుగా ఈ సినిమాలో కనిపిస్తున్నారు చిరు మ‌రియు చరణ్.
చిరంజీవి దేవాదాయ శాఖలో బాధ్య‌త‌లు నిర్వర్తించే ఉద్యోగి పాత్రలో కనిపించనున్నారు. క‌థ‌కు అనుగుణంగా ఈ సినిమాలో చిరంజీవి గతంలో వచ్చిన సినిమాల క‌న్నా ఇంకా ఎక్కువ యంగ్ లుక్ లో కనిపిస్తున్నారు. అస‌లు ఆయన స్క్రీన్ ప్రెజెన్సే అదుర్స్ ! చరణ్ క‌న్నా యంగ్ గా క‌నిపిస్తున్నారంటే అందుకు ఆయన కృషే ఓ గొప్ప కార‌ణం.
అర‌వైల‌లో ఉన్న హీరోలందరికీ చిరూనే ఓ రోల్ మోడ‌ల్.అందుకే రామ్ చరణ్ పాత్రకు గట్టి పోటీ ఇచ్చే విధంగా చిరంజీవి పాత్రను కొరటాల డిజైన్ చేశారు. సినిమా విడుదల అయ్యేందుకు కేవలం కొన్ని గంటలు మాత్రమే ఉండటంతో అభిమానులు అంచ‌నాలు మ‌రింత రెట్టింపు అవుతున్నాయి. ఇదే సంద‌ర్భంలో మూవీకి సంబంధించి కొన్ని విశేషాలు ప్ర‌మోష‌న్లలో భాగంగా చెబుతున్నారు చిరు.
అంతేకాదు త‌న అప్ కమింగ్ ప్రాజెక్టుల గురించి కూడా చెబుతూ మ‌రింత ఉత్సాహంతో త‌న మాట‌లు కొన‌సాగిస్తున్నారు. యాంక‌ర్ల‌ను ఆట‌ప‌ట్టిస్తూ, సెటైర్లు వేస్తూ చిరు జోష్ లో ఉన్నారు. ప‌క్క‌నే ఉన్న రామ్ చరణ్ క‌న్నా, కొరటాల శివ క‌న్నా, పూజా హెగ్డే క‌న్నా ఆయ‌నే ఎక్కువ‌గా దూసుకుపోతున్నారు. ఇక ఈ సినిమా గురించి మ‌రో ఇంట్ర‌స్టింగ్ అప్డేట్ వ‌చ్చింది..అదేంటంటే..ఆచార్య సినిమాకు పవన్ ఓ స్పెషల్ అట్రాక్ష‌న్ కానున్నారు అని ..!
