తెలుగులో సినిమాలు తగ్గాయి కానీ.. బాలీవుడ్లో మాత్రం రకుల్ ప్రీత్‌కు అవకాశాలకు లోటు లేదు. అక్కడ క్రేజీ ప్రాజెక్టులతో ఆమె దూసుకెళ్తోంది. జాన్ అబ్రహాం సరసన ‘ఎటాక్’.. అమితాబ్ బచ్చన్-అజయ్ దేవగణ్ కాంబినేషన్లో తెరకెక్కుతున్న ‘మే డే’అజయ్ దేవగణ్-సిద్దార్థ్ మల్హోత్రా ప్రధాన పాత్రల్లో రూపొందుతున్న ‘థ్యాంక్ గాడ్’ లాంటి భారీ చిత్రాల్లో ఆమె కథానాయికగా నటిస్తోంది. ఇప్పుడు ఆమె లిస్టులోకి మరో పెద్ద సినిమా వచ్చి చేరింది.
ఆమె అక్షయ్ కుమార్‌కు జోడీగా నటించబోతోంది. ఇటీవలే అక్షయ్ తమిళ సూపర్ హిట్ మూవీ ‘రాక్షసన్’ రీమేక్ హక్కులను సొంతం చేసుకున్న సంగతి తెలిసిందే. అక్షయ్ సొంత నిర్మాణ సంస్థలో తెరకెక్కుతున్న ఈ చిత్రంలో ఆయనే లీడ్ రోల్ చేయబోతున్నాడు. ఇందులో కథానాయికగా రకుల్ ప్రీత్ నటించనున్నట్లు బాలీవుడ్ మీడియాలో వార్తొస్తున్నాయి. అక్షయ్‌తో ‘బెల్‌బాటమ్’ సినిమా తీసిన రెంజిత్ తివారి ఈ చిత్రాన్ని దర్శకత్వం వహించనున్నాడు.
తమిళంలో విష్ణు విశాల్, అమలాపాల్ జంటగా రామ్ కుమార్ రూపొందించిన ‘రాక్షసన్’ 2018లో విడుదలై భారీ విజయం సాధించింది. ఆ తర్వాత తెలుగులో బెల్లంకొండ శ్రీనివాస్, అనుపమ పరమేశ్వరన్ జంటగా రమేష్ వర్మ దర్శకత్వంలో ‘రాక్షసుడు’ పేరుతో రీమేక్ చేస్తే ఇక్కడా మంచి ఫలితాన్నే అందుకుంది. ఈ చిత్రాన్ని తెలుగులో నిర్మించిన హవీష్ హిందీలోనూ తమ సంస్థలోనే రీమేక్ చేయాలనుకున్నాడు కానీ.. కరోనా కారణంగా కుదరక అక్షయ్ కుమార్‌కు రీమేక్ హక్కులు ఇచ్చేశాడు.
శరవేగంగా సినిమాలు చేసుకుపోయే అక్షయ్ కుమార్‌కు ఈ రీమేక్ మూవీని లాగించేయడానికి ఎంతో సమయం పట్టకపోవచ్చు. రకుల్ విషయానికి వస్తే.. అక్షయ్ కుమార్‌కు జోడీగా నటించబోతుండటం ఆమెకిదే తొలిసారి. ఒకప్పుడు తెలుగులో టాప్ హీరోయిన్‌గా హవా సాగించిన రకుల్‌కు.. గత కొన్నేళ్ల నుంచి అంతగా కలిసి రావట్లేదు. తెలుగులో ప్రస్తుతం క్రిష్-వైష్ణవ్ తేజ్ కలయికలో నటించిన చిత్రంలో కథానాయికగా చేసింది. తమిళంలో శివకార్తికేయన్ హీరోగా తెరకెక్కిన ‘అయలాన్’లో ఆమె హీరోయిన్‌గా చేస్తోంది.
