టాలీవుడ్ దర్శక ధీరుడు రాజమౌళి తెరకెక్కిస్తోన్న ‘ఆర్ఆర్ఆర్’ చిత్రంపై భారీ అంచనాలున్న సంగతి తెలిసిందే. జక్కన్న చెక్కుతోన్న ఈ పాన్ ఇండియా మూవీ కోసం దేశవ్యాప్తంగా సినీ అభిమానులు ఆతృతగా ఎదురుచూస్తున్నారు. మెగా పవర్ స్టార్ రామ్ చరణ్, యంగ్ టైగర్ జూనియర్ ఎన్టీఆర్ వంటి స్టార్ హీరోలతో జక్కన్న మలిచిన ఈ భారీ మల్టీస్టారర్ మరో బాహుబలి కానుందని అంచనాలున్నాయి.
ఆ అంచనాలకు తగ్గట్టుగానే ‘ఆర్ఆర్ఆర్’టీమ్ నుంచి ఇప్పటివరకు వచ్చిన ప్రతి అప్డేట్ వైరల్ అయింది. ఇక, దాదాపుగా చిత్రీకణ పూర్తి చేసుకున్న ఈ చిత్రం నుంచి తాజాగా మరో అదిరిపోయే అప్డేట్ వచ్చింది. కొమురం భీం, అల్లూరి సీతారామరాజులు బైక్ మీద వెళుతున్న ఫొటోను ఆర్ఆర్ఆర్ టీం తన ట్విటర్ ఖాతాలో షేర్ చేసింది. శరవేగంగా దూసుకువస్తున్నాం…అంటూ భీం నడుపుతున్న బైక్ మీద రాం కూర్చుని ఉన్న ఫొటో ఇపుడు ఇంటర్నెట్ ను షేక్ చేస్తోంది.
టాలీవుడ్ స్టార్ హీరోలిద్దరూ చిరునవ్వులు చిందిస్తున్న ఈ క్రేజీ పోస్టర్ వైరల్ అయింది. కేవలం రెండు పాటల మినహా సినిమా షూటింగ్ మొత్తం పూర్తయిపోయిందని ఫ్యాన్స్ కు గుడ్ న్యూస్ చెప్పారు రాజమౌళి. ఎన్టీయార్, చెర్రీ రెండు భాషలలో డబ్బింగ్ కూడా పూర్తి చేశారని, మిగతా భాషలలోనూ త్వరగా పూర్తి చేస్తారని ప్రకటించారు. మిగిలిన కార్యక్రమాలూ శరవేగంగా సాగుతాయనే హామీని ఇచ్చింది చిత్ర యూనిట్. అయితే, అక్టోబర్ 13న చిత్రం రిలీజ్ అవుతుందో లేదో అన్న క్లారిటీ మాత్రం ఇవ్వలేదు.
మరోవైపు, ఆర్ఆర్ఆర్ టీం రిలీజ్ చేసిన ఫొటోను సైబరాబాద్ పోలీసులు ఓ రేంజ్ లో వాడేశారు. పోస్టర్ లో ఆ ఇద్దరికీ హెల్మెట్లు పెట్టి… ఇప్పుడు పరిపూర్ణంగా ఉందంటూ సైబరాబాద్ పోలీసులు ట్వీట్ చేశారు. హెల్మెట్ ధరించండి.. సురక్షితంగా ఉండండి అంటూ చేసిన ట్వీట్ వైరల్ అయింది. అయితే, సైబరాబాద్ పోలీసులు ట్వీట్ పై ఆర్ఆర్ఆర్ టీం స్పందించింది. ఆ బండికి నంబర్ ప్లేట్ కూడా లేదని, ఆ పోస్టర్ ఇంకా అసంపూర్ణంగానే ఉందని ఫన్నీగా రీట్వీట్ చేసింది. ఏది ఏమైనా ఆర్ఆర్ఆర్ ఫ్యాన్స్ కు రాజమౌళి ట్రీట్ ఇస్తే…పోస్టర్ ను ఇలా వాడేసి సైబరాబాద్ పోలీసులు షాక్ ఇచ్చారని నెటిజన్లు ఫన్నీగా కామెంట్లు పెడుతున్నారు.
